Siglir tar il cuntegn

Header

audio
Pled sin via dad Arno Arquint
Or da Vita e cretta dals 04.12.2022. Maletg: MAD
laschar ir. Durada: 3 minutas 10 Secundas.
cuntegn

Pled sin via Chenüna es tia lingua d’amur?

Chenüna es tia lingua preferida? – Na, eu nu manaj uossa chenüna lingua chi t’ha plaschü il plü bain, scha quai es forsa il spagnöl o il frances. Eu nu manaj neir chenüna chi’d es tia lingua da la mamma, forsa il rumantsch o il tudais-ch.

Mia dumonda es tuot ün’otra: Chenüna es tia lingua d’amur? Lingua d’amur? Che es quai? – La lingua d’amur es quella lingua cha nos cour inclegia il meglder. Id es quella lingua chi ans fa sentir bain e cuntaint. Scha inchün discuorra cun nus in nossa lingua d’amur, ans sentin nus furtünats ed impustüt amats. Lura badain nus cha quella persuna chi discuorra cun nus, saja quai nossa duonna, nos hom, noss uffant, nossa mamma, nos bap o inchün oter, ans vezza, ans inclegia ed ans ha jent.

Per pudair far regals chi fan propcha plaschair füssa dimena fich important da cugnuoscher la lingua d’amur da quella persuna chi tschüffarà nos regal.
Autur: Arno Arquint Teolog e psicolog

Tenor il terapeut american Gary Chapman daja tschinch linguas d’amur principalas. La prüma es lod ed arcugnuschentscha. La seguonda es temp exclusiv. La terza es regals chi vegnan da cour. La quarta es serviziaivlezza. E la tschinchavla es intimità corporala.

Dürant il temp d’Advent ans faina blers impissamaints che cha nus pudessan regalar a nossas charas ed a noss chars. Quai nun es pero uschè simpel – ed adüna darcheu regalaina alch chi nu fa plaschair. Quatras daja minchatant dischillusiuns suot il bös-chin da Nadal. Per pudair far regals chi fan propcha plaschair füssa dimena fich important da cugnuoscher la lingua d’amur da quella persuna chi tschüffarà nos regal. Sainza empatia e sainza tadlar nun esa pussibel da cugnuoscher la lingua d’amur dals oters.

Co füss quai, scha nus ans pigliessan temp dürant l’advent per ün discuors cun noss chars per chattar oura la lingua d’amur da quistas persunas? Nus pudessan lura far ün pêr dumondas sco per exaimpel: «In che situaziuns badast tü ch’eu n’ha jent a tai? Cura at saintast tü amà da mai? In che möd muossast tü tia amur per mai? Che poss eu far per commover teis cour?»

Las respostas sün quistas dumondas ans muossaran la via sülla tschercha da regals – chi faran cun garanzia grond plaschair.

RTR 08.45 Pled sin via

Artitgels legids il pli savens

Scrollar a sanestra Scrollar a dretga