Jeu stoi conceder: propi bia ei buca restau a mi dil grec ch’jeu hai empriu a moda rudimentara en miu studi da teologia. Il diever da quei lungatg ei buc exnum dumandaus en mia lavur pastorala. Naturalmein savess jeu leger per exercezi igl evangeli dil di mintgamai en grec, il lungatg primar dil Niev Testament. Denton, ton temps vi e sai jeu buc investar per tener a frestg quei lungatg. Schi bials ed interessants sco el ei!
Certs plaids grecs ein denton tuttina restai a mi. P. ex. la differenziaziun dil temps entras ils plaids chronos e kairos. L’expressiun chronos drova il lungatg grec pil temps ch’ins sa miserar: quel dallas secundas, uras e.a.v. Fastitgs da quei plaid anflein nus era el romontsch, p. ex. cu nus plidein dad ina malsogna cronica ni en connex cun in giubileum dad ina uniun, cu ina cronica vegn scretta.
Tier il kairos va ei buca per la quantitad, mobein per la qualitad dil temps. El ei buca limitaus, el ei senza dimensiun.
L’expressiun greca kairos perencunter manegia il dretg mument. Kairos pertucca ni il vargau ni il futur, mobein il present, quei ch’ei gest actual. Il kairos pretenda dad esser attents, da buca munchentar la schanza, da nezegiar la caschun. Tier il kairos va ei buca per la quantitad, mobein per la qualitad dil temps. El ei buca limitaus, el ei senza dimensiun.
Quella differenziaziun va tenor miu manegiar bein a prau cul november. Igl ei in meins che lai vegnir nus pertscharts che nies chronos, pia nies temps dallas minutas, uras, dis ed onns ei vargheivels e limitaus. Quei temps ei era staus limitaus tier nossas caras e nos cars, dils quals nus vein stuiu prender cumiau per adina, nos morts. Enten seregurdar dad els, savein nus vegnir cunscients che buca il temps el senn dil chronos ei decisivs, mobein quel dil kairos. Quei che resta ei buca la quantitad dallas uras, mobein la qualitad dil temps che nus vein passentau cun els. Quella enconuschientscha duei era purtar nus en nies mintgadi. Ella duei gidar da metter prioritads, da nezegiar il dretg mument ed impunder temps pigl essenzial. Forsa ch’ins savess schizun pretender: Il chronos ei in regal da Diu, pil kairos essan nus sezs responsabels.