(sursilvan) Avon in pèr onns ha Cuera turissem fatg reclama per nossa capitala cun suandont slogan: Cuera – perquei ch’ei dat cheu dapli. Ed igl ei ver. A Cuera dat ei propi da veser dapli. Ina remarcabladad ch’ei en auters marcaus daditg historia. Numnadamein ina scena da drogas aviarta amiez il marcau. El Stadtpark avon las portas dil marcau vegl.
Daco ston tut quellas dunnas e tut quels umens star da tut aura giuadora e consumar sut miserablas circumstanzas higenicas?
Quei parc che schai gest sper l’Engadinerstrasse ei circumdaus da mirs aults. Ed era sche quels mirs freids paran da zuppar quella tragedia – ils visitaders e las visitadras dil Stadtpark ein presentas sillas vias dil marcau vegl. Lur fatschas ein enconuschentas, per part novas e per part aschi giuvnas ch’ins peglia prest tema. Cun ina gnervusa egliada e fatschas scufladas calzereschan els per las vias – adina alla tscherca dad in «Stutz für Notschlofstell».
Jeu stun gest ella vischinonza dil Stadtpark e passel el aschia mintga di. E mintga di dun jeu in'egliada viaden e vesel co varga in tozzel persunas passentan leu lur di. E quei da tut aura gia baul la damaun entochen lunsch viaden ella notg. Bunamein 24 uras a di. Igl ei in liug da sentupada e consumaziun per persunas malsaunas da drogas.
Mintgaga sch’jeu passel il Stadtpark sche sedamondel: Daco ston tut quellas dunnas e tut quels umens star da tut aura giuadora e consumar sut circumstanzas higenicas miserablas? Daco gida negin quellas persunas?Experientschas cun scenas da drogas aviartas han ins gie atgnamein fatg avunda en Svizra. Ed era a Cuera fussan sligiaziuns sin meisa. Organisaziuns d’agid pretendan daditg in aschi numnau «Fixerstübli». Pia, ina localitad che dependents e dependentas da drogas san consumar en ruaus e star a cauld. In concept ch’ei gia secumprovaus a Berna e ch’ei dat en siat ulteriurs marcaus dalla Svizra. Daco pia buca a Cuera?
En in'intervesta ord igl onn 2021 argumentescha ina persuna responsabla ch’ei seigi denter auter era ina damonda da cuosts e nez. Cuosts e nez. Astg’ins tschentar la damonda da cuosts e nez sch’ei tracta da gidar a persunas ch’ein malsaunas? Principalmein sco pli reha tiara dil mund? Tgei di insumma la cardientscha cristiana da quei? Sch’ins tschenta la damonda da cuosts e nez per porscher in suttetg a persunas malsaunas.
Sch’ins ei denton alla testa e senumna uss center sche ston ins forsa era buca pli sempatschar dallas persunas agl ur dalla societad. Tgi sa. Ei vesa buc ora sco sche zatgei vegness a semidar en caussa. Buc oz ni damaun. Ed aschia passentan era damaun malsauns da drogas lur di el Stadtpark. Ed jeu vegn puspei a passar il parc e sedumandar: Co pil giavel ei aschia zatgei mo pusseivel?