Ei dat fetg differentas modas da decorar il pigniel. Per mei astgan las cullas da Nadal en tutta cass buca muncar. Tier nus ein enzacontas enzugliadas d’ina puorla sbrinzlonta, autras han ina surfatscha neidia sco in spieghel.
Forsa eisi dau en egl ad ina ni l’auter, tgei che schabegia, sch’ins va vitier vitier ad ina da quellas cullas neidias. Gest pils affons ei quei magari legher. Ins vesa gie sesez ella culla, denton cun in nas suflau si, vestas scuflentadas ed in frunt stendiu. Ils cavels perencunter svaneschan bunamein ed era las ureglias ein mo pintgas e satellas.
E per cass ch’enzatgi ha tuttina in tec retenientschas da star taluisa el center, sche astga el buc emblidar: Vid il pigniel pendan pliras cullas e sigl entir mund datti ina massa pigneuls – avunda cullas per tuts.
La culla cun siu venter strai e strubegia pia vid nossa fatscha a moda divertenta. Tonpli sche nus semuentein vidaneu avon la culla. Quei ch’ei enamiez daventa surdimensiunal e quei ch’ei agl ur svanescha quasi el nuot. Aschia astgi era esser da Nadal. Quei che vegn mess el center, duei survegnir spazi. Igl auter savein nus ruasseivlamein metter d’ina vart. Mo tgei duei star el center? La famiglia, igl affon Jesus, la cuminonza, la pasch…
Per cass ch’enzatgi dat uss sez in’egliada en ina culla da Nadal e vesa sesez lien, sche eisi buc da pigliar tema ch’ins semetti sesez el center. Quei ei part dil misteri da Nadal. Pertgei Jesus ei daventaus carstgaun per rinforzar en nus nies agen «esser divin». El ch’ei Dieus, ei daventaus carstgaun. E nus carstgauns savein esser spieghel pil divin. Nus stuein pia buc sezuppar agl ur, mobein star neu e dar perdetga.
E per cass ch’enzatgi ha tuttina in tec retenientschas da star taluisa el center, sche astga el buc emblidar: Vid il pigniel pendan pliras cullas e sigl entir mund datti ina massa pigneuls – avunda cullas per tuts. Gie, mintga carstgaun ei clamaus da resplender Diu en sia veta.