Siglir tar il cuntegn

Header

audio
Pled sin via dad Andri Casanova
Or da Vita e cretta dals 26.06.2022.
abspielen. Laufzeit 2 minutas 33 Sekunden.
cuntegn

Pled sin via Cun cumpass drizzau

Sco cristiana e cristian s’orientein nus vida Cristus. El ei schidagir nies cumpass. Cristus ei quel che dat orientaziun a nus. – Forsa veis era gia udiu quella cumparegliaziun cul cumpass. Jeu sun sedumandaus, sche quei sempel maletg ha bein era in cuntegn substanzius?

In cumpass indichescha cun sia guila magnetica il nord. Nus savein strubegiar il cumpass sco nus lein, alla fin mira la guila encunter nord. Il cumpass sa adina, nua ch’il nord ei. Ei emporta buc, sche nus vein bial’aura, sch’ei dracca ni sche nus essan amiez la nebla, il cumpass dat en mintga cass orientaziun.

Ei dat numerusas direcziuns atras il mund e la veta.
Autur: Andri Casanova Teolog

Aschia astgein nus senz’auter capir la muntada da Cristus. Nus anflein en sia nuviala orientaziun, cu ei va bein cun nus, cu nus essan trests e cu nus essan senza perspectivas. Cristus ei pia nies cumpass.

Jeu manegiel denton ch’ei fuss falliu da crer che Cristus seigi per nus sco la guila dil cumpass che muossa ina suletta direcziun e via. La guila vul gie buca dictar en tgei direcziun ch’ins semova. Ella indichescha semplamein il nord. Pér cun agiustar la rosa dil cumpass vesein nus las direcziuns. Ed ei dat numerusas direcziuns atras il mund e la veta.

Sche nus entupein pia enzatgi che va en in’autra direcziun che nus, sche ei quei segir buc in motiv da condemnar quel. Anzi, igl impurtont ei da s’entupar e seconversar. Pér aschia essan nus capavels da far nossas atgnas correcturas. Ins sto numnadamein saver che mintga cumpass drova ina leva correctura da quei che la guila indichescha. Lezza muossa gie en direcziun dil pol magnetic ch’ei movibels ed actualmein ca. 1000 km naven dil pol dil nord.

Sche nus lein pia saver sefidar dil cumpass, drova ei quella aviartadad da seschar curreger dils pli differents concarstgauns ed era dil temps che semida.

RTR 08:45 Pled sin via

Artitgels legids il pli savens

Scrollar a sanestra Scrollar a dretga