(sursilvan) Daco? Daco pomai? Co ha quei pudiu capitar? Tgei mals han tut quellas persunas stuiu supportar, tuts quels ch’ein vegni violai entras representants dalla baselgia? Cons responsabels han disgiu en lur funcziun? Quei fa esser perplexs.
Tut quei turmenta mei ed jeu sun sedumandaus daco. Eis ei il fatg che jeu mez fetsch part da quella baselgia e s’engaschel enteifer quell’instituziun? Quei patratg po parer normals ed innocents, denton eis el marschs. El ei da medema tempra sco quella tenuta che ha multiplicau il mal dallas unfrendas. Con bia ei vegniu teniu tschelau e co ei vegniu turschau per gie presentar ina baselgia intacta! Igl ei vegniu engrondiu il mal e zappitschau sin persunas suffrentas, e quei cun la perschuasiun ch’ei capeti ord spir carezia per la baselgia.
Con bia ei vegniu teniu tschelau e co ei vegniu turschau per gie presentar ina baselgia intacta! Igl ei vegniu engrondiu il mal e zappitschau sin persunas suffrentas.
Era jeu hai stuiu emprender da differenziar. Pia, sch’ei fa mal d’udir da tut quellas unfrendas, lu buca pervia dalla baselgia. Ei dat el latin l’expressiun «sentire cum ecclesia», pia «sentir cun la baselgia», ina sort solidaritad cun la baselgia. Mo tala solidaritad ei ussa veramein deplazzada. Sch’igl ei da sesolidarisar cun enzatgi, lu cun las unfrendas. Gliez ei quei che fa mal. Ellas portan buordis smacconts. Ei maunca ils plaids, ei maunca il tegn, ei maunca la forza.
Perquei eis ei bien che tut quei vegn alla glisch. Possi quei dar forza a quels che suffreschan. Possi quei dar aria a quels che han tochen oz talas nauschas experientschas che smaccan senza ch’enzatgi savess dad ei.
Ei dat ussa duas sorts vuschs che munglassen sefar udir. Dad ina vart la vusch dallas unfrendas. Quei va vess ed ils plaids selain strusch s’exprimer, mo ei po esser deliberont. E da l’autra vart la vusch da persunas ch’ein oz en situaziuns da surpassaments. Igl ei giustificau ed endretg da gir: «Hej, ti vegns memia datier!» ni «Na, quei vi jeu buc!» ni «Jeu sesentel buc bein, jeu mon!»