Siglir tar il cuntegn

Header

audio
Pled sin via dad Arno Arquint
Or da Vita e cretta dals 07.05.2023. Maletg: MAD
laschar ir. Durada: 3 minutas 59 Secundas.
cuntegn

Pled sin via Cur cha duos creschüts fan dispitta

(vallader) Suvent cur cha duos creschüts fan dispitta para quai be cha duos creschüts fessan dispitta. Suvent nu sun quai però propcha duos creschüts chi fan dispitta – dimpersè duos uffants. Duos uffants chi nu retschaivan da tschella persuna quai ch’els vulessan e dovressan. Duos uffants ferits o forsa dafatta traumatisats chi improuvan per tuot predsch da survgnir quai ch’els as giavüschessan. Duos uffants chi sun dafatta pronts da sbragir e ferir l’otra persuna per gnir a quista mera. Simplamaing per gnir a quel böt tant bramà: Da gnir vis. Da gnir inclet. Da gnir acceptà. Da gnir respettà. Da gnir amà.

Che douvra l’uman in prüma lingia cur ch’el vain sül muond? Fich simpel: Quai sun amur, sgürezza e protecziun. Sainza amur, sgürezza e protecziun gess il nouvnaschü svelt in malura. Ma cun quai chi nu dà ingüns genituors perfets, nu survegn ingün uffant in seis prüms ons tuot quai ch’el dovress. E perquai ch’el nun ha retschevü adüna tuot quai ch’el vess dovrà in sia infanzia, es el pel rest da sia vita in tschercha da quai chi til manca. Adün’inavant tschercha’l l’incletta. L’amur. Il respet. L’acceptanza. La sgürezza. Daplü cha l’uffant ha stuvü desister da quists bsögns elementars plü gronda es la foura in el. E daplü cha’l creschü improuva lura plü tard dad implir quista foura cun quai ch’el vess dovrà fingià avant blers ons.

Che douvra l’uman in prüma lingia cur ch’el vain sül muond? Fich simpel: Quai sun amur, sgürezza e protecziun.
Autur: Arno Arquint Psicoterapeut e cussegliader da letg

Perquai vain Sara tant trista cur cha Felix riva a chasa la saira davo lavur e guarda plü gugent in seis telefonin co da discuorrer cun ella. Ella til tgness uschè jent ün païn e quintess da seis di. Ma a Felix, uschè pensa ella, es quai tuot listess, el nu s’interessa per mai, forsa nu m’ama’l gnanca plü. Forsa am voul el bandunar. Forsa ha’l fingià ün’otra. Ed our da la tristezza daja uschea svelt üna gronda gritta e disperaziun. E la dispitta nun es plü dalönch davent. Cur cha Sara cumainza a sbragir nun inclegia Felix plü il muond. Ma quai nun as lascha el plaschair. Quista femna malcuntainta, pensa el. E sta sü e va dad üsch oura. Tascha. Tascha eir ils prossems dis. Quista duonna ha simplamaing ün grond problem. Ella nu m’ha plü jent, pensa el, uschigliö as s-chüsess ella. Forsa es tuot a fin.

Sch’ün spectatur extern observess quista scena, vess el forsa l’impreschiun cha duos creschüts fetschan dispitta. Ma el nu vess radschun. Quai ch’el vezzess nu füssan duos creschüts chi fan guerra. Quai ch’el vezzess füssan duos uffants ferits chi prouvan da survgnir quai chi tils mancaiva forsa fingià daspö decennis. Duos uffants ferits e traumatisats in tschercha da sgürezza, incletta ed amur.

RTR Vita e Cretta 08:00

Artitgels legids il pli savens