(surmiran) La magia digl nov inspirescha da far propiests e d’ampruar novas tgossas. I dat en’energeia tot speziala, aglmanc tar me. Uscheia vaia fitg gugent la midada digl onn e titulesch igls meis december e schaner, scu igls mies meis preferias. Tot para pussebel e las marveglias èn grondas tge tg’igl nov onn porta. Propiests classics fatscha betg ple, ma fegnameiras am metta. Ia focussesch igls temas tgi dessan esser impurtants chest onn.
El dei, tg’el fetscha betg part alla concurrenza! El resista agl sforz da gruppa. El metta en cler cunfegn per sasez e dei na. Tge curasch!
Chest’antschatta digl onn am inspirescha egn digls mies codeschs d’unfants preferias: «Curaschus, curaschus» da Lorenz Pauli e Kathrin Schärer. Tenor me ègl en codesch tgi mintg’unfant dess liger e chegl ples gedas.
L’istorgia ò li sper en pitschen poz. Igls caracters principals èn igls animals, tgi abiteschan agl poz. Els s’antopan e mintg’animal mossa alloura curasch cun en’acziun. Tots èn fitg ambizious e las acziuns survignan en caracter da concurrenza. Alla fegn è igl pitschen pasler vedlonder. Ma tge fò’l? El dei, tg’el fetscha betg part alla concurrenza! El resista agl sforz da gruppa. El metta en cler cunfegn per sasez e dei na. – Tge curasch!
Ia schess da mamezza betg tg’ia seia en carstgang curaschous. E tuttegna ò igl pitschen pasler e la magia digl nov inspiro da m’annunztgier ad en de da scolaziun tg’am interessescha gio treis onns. Pertge dovra chel curasch az dumandez?
La scolaziun era a Hannover. Otg ouras suletta cugl auto e chegl an maximal dus e mez deis. La responsabladad per dus tgangs e mamezza. Sfeidas, scu esser la notg suletta an en restorant d’autostrada, per tancar. Otg ouras star alla roda da palar.
Curasch è per mintgign ensatge oter. Ma i vo betg angal pigl curasch. Siva d’aveir musso curasch suonda quasi igl dessert: la luschezza.
Durant igl mies viadi è la luschezza carscheida tar mintga kilometer fatg.
Er parteir pansiers agl radio ed an gasetta dovra curasch. Ma speranza, tgi er chest onn on bleras persungas igl curasch da parteir lour pansiers ed istorgias cun nous.