Siglir tar il cuntegn

Header

audio
Pled sin via
Or da Vita e cretta dals 18.02.2022. Maletg: MAD
laschar ir. Durada: 2 minutas 59 Secundas.
cuntegn

Pled sin via Da stentas e legria

Il mument suenter la cuorsa. In mument stat il mund eri. In sguard sin la tabla – ed ei cumpara la numra 1. Ella trai flad. Las cameras registreschan mintga moviment da sia fatscha. Il sulegl ed il metal dalla medaglia tarlischan ella medema colur. La medaglia d’aur. Igl ei gartegiau.

Ei era buca adina aschia. Ei ha dau bia muments ch’ella ha buca contonschiu sia finamira. Che las cameras han filmau ina fatscha trumpada. Plein malcuntentientscha. Il sulegl fageva tarlischar las larmas entuorn ils egls ch’ella vuleva buca mussar a gl’entir mund, mo era lu registravan las cameras min­tga moviment dalla heroxa. In amen pli tard vulevan las cameras aunc plaid e fatg a dispet ni grad causa dalla trumpada. Ei valeva da respectar igl interess dallas medias, da dar risposta a lur damondas e daco ch’ella hagi quella gada buca saviu mussar siu potenzial.

E lu ei il di cheu. Igl ei in bi di. Ins vesa clar: ella sesenta bein.
Autur: Silvia Gartmann Scienziada da religiun

Ni il schoc suenter ina cupitgada. Beingleiti la truppa da sanitad entuorn ella. Doctras che cusseglian ina l’autra. Ei suonda l’operaziun ed il training da rehabilitaziun duront meins. In futur nunguess culla damonda, schebein ella sappi aunc inaga anflar anavos sin quei nivel ault mundial. «Tgei fas suenter tia carriera da profi? Vas ad emprender in mistregn? Tgeinin? Daventas trenadra?»

Dis ed jamnas vargan. Plein mal­guessadad. Mintgaton va ei in grond pass anavon, mintgaton in grond pass anavos.

E lu ei il di cheu. Igl ei in bi di. Ins vesa clar: ella sesenta bein. Nuot pli che fa sminar ch’ella ei stada en ina val da larmas. Il sulegl tarlischa e sclarescha sia fatscha. Suenter tontas uras e stentas duront il trenament selegra ella sin la cuorsa e biaras cuorsas che vegnan aunc a vegnir. Ella ei semtgada. Promta per puspei semiar da cuorsas che meinan sil podest, che muossan a tuts tgei potenzial che schai en ella, che lai tarlischar mellis fatschas.

E tuttenina eis ei realitad. Ei suonda la premiaziun sil podest cun in surrir sin fatscha. Il sulegl fa tarlischar sia iris en tschienmelli colurs. La naziun ed il sport dattan in griu plein legria: Nus vein gudignau.

RTR Vita e cretta 08:00

Artitgels legids il pli savens