(vallader) Scha l’emissiun da vita e cretta tematisescha pel mumaint la toleranza, lura ha quella üna pitschna sour: il respet.
Che chi’d es la differenza n’haja pudü constatar avant desch dis sün mia toura da velo tras la Svizra e fin pro meis filgioul a Nürnberg in Germania.
Sün via cul velo as imprenda vaira svelt la differenza tanter toleranza e respet – impustüt cur cha autos e camiuns tschüffan avant. Là daja quellas ed impustüt quels chi concedan al ciclist precis la surfatscha da duos meters lungezza e 70 centimeters largezza. Els passan avant subit cur ch’els han amo ils 30 centimeters toleranza per na toccar aint cun lur spejel. Quai sun ils tolerants. Els tolereschan nempè il velo sco impedimaint fin a quel mumaint ch’els pon til laschar davo els per tour darcheu in possess lur via. Sün via sun quels per furtüna stats üna pitschna minorità; ma üna chi’s manifestescha – sco eir uschigliö i’l minchadi. Üna minorità chi porta in sai adüna eir l’intoleranza.
In pacs lös sun eu stat cun meis velo bain chargià be tolerà; pel solit suna stat respettà ed acceptà.
Da tschella vart n’haja inscuntrà fich blera glieud cun grond respet – quai impustüt eir in Germania. I sun quellas e quels chi ha acceptà, ch’eu sco ciclist sun plü plan. Els han resguardà ch’eu fetsch minchatant pitschnas stortas sülla gualiva, güst là ingio chi va amunt. I sun quels chi acceptan cha lur viadi düra hoz forza ün minut plü lönch e passan avant in ün lö sgür cun üna distanza respettabla. La gronda majorità s’ha deportada uschè ed ha respettà la realtà da mai sco ciclist.
In pacs lös sun eu stat cun meis velo bain chargià be tolerà; pel solit suna stat respettà ed acceptà.
I’s disch cha sün via as muossa co chi sta cun nossa convivenza. Scha quai tuorna, lura dominescha amo adüna il respet vicendaival sur da toleranza ed intoleranza.
A propos: Eir aint il nouv testamaint chattaina bleras dumondas da respet e pacas da toleranza. Gesu inscuntra als umans cun grond respet, tils piglia serius in lur situaziuns, güst eir cun lur pissers, deblezzas e bsögns. Ch’i saja ils scolars chi sun infomantats e ramassan granezza al di dal Sabbat. El defenda il respet invers ils bsögns fundamentals da la vita cunter quels chi pretendan, cha la ledgia nu tolerescha. O l’inscunter cun üna duonna pechadra sper il bügl. Gesu demuossa grond respet per sia sort avant co tilla invidar da müdar sia via. Be pro’ls marchadants aint il taimpel sun per Gesu surpassats tuot ils cunfins da la toleranza ed el perda il respet.
Ma tuornaina pro’l viadi cul velo. Per mai sun quels dis stats üna bun scoula da toleranza e da respet. Eu n’ha imprais quant sforz cha meis corp tolerescha e da respettar meis cunfins. Ed eu n’ha imprais da acceptar eir ils mumaints cur chi d’eira da’s dumondar, quanta toleranza chi d’eira in quista situaziun.
Eu craj, cha tuot ha da cumanzar pro’l respet invers sai stess avant tuotta discussiun sur da la toleranza invers tschels.