(sursilvan) Il renomau sociolog tudestg, Hartmut Rosa, ponderescha en siu cudisch, schebein la democrazia drovi la religiun. Ina damonda fetg populara che vegn el futur ad influenzar il svilup da nies temps modern. El reflectescha tgei che nossa societad piardi, cura che la religiun gioga buca pli ina rolla per ella. El sedamonda, sch’ei seigi veramein aschi prudent da desister dil grond e reh scazi che la religiun ha da porscher alla carstgaunadad.
Buca in dad els desisti u d’in maletg d’in sogn, da Niessegner, da Nossadunna ni in auter simbol religius sco schurmetg persunal el cumbat dall’uiara.
Cun ses patratgs e plaids tucca el nossa capientscha, sco sch’in cunti gizzau tagliass in det. Mo alla fin resumescha el e vegn alla conclusiun, che la democrazia drovi la religiun.
Sia conclusiun irritescha forsa enqualin da nus. En nies temps modern s’allontanein nus pli e pli fetg dalla religiun e biars ein plitost sin la tscherca da religiuns cumpensativas.
Hartmut Rosa argumentescha che la democrazia funcziuneschi mo sche burgheis e burgheisas entaupien in l’auter aviartamein e seigien era promts da tedlar tgei che l’auter haigi da dir a nus. Plinavon seigi ei necessari da saver udir cul cor, pia da sviluppar empatia. In cor che gida nus da seschar commuentar da quei che schabegia en nies contuorn. Seschar en sin novas relaziuns cun sesez, cul mund, cul concarstgaun ed era cun tals ch’ein buca dal medem meini sco nus. Per contonscher tut quellas finamiras gidia la religiun da veser il mund cun ina pli gronda perspectiva.
Tgi che va en ina baselgia ha in auter sentiment ch’in che va en ina stizun. Pertgei sch’ina societad piarda quei senn da seschar commuentar, sesviluppar e transformar, lu seigi ella piarsa. La societad drovi la religiun perquei ch’entras ella sappien nus anflar in’autra relaziun, in’autra cultura politica ch’ei era per nus nizzeivla, aschia il sociolog Hartmut Rosa.
Jeu per mia part schazegel adina puspei las profundas ragischs ed ils ligioms che jeu haiel astgau sentir e viver entras la religiun en mia veta persunala. Dacuort sundel s’entupada cun ina autoritad religiusa dall’Ucraina. Duront nies discuors ha el confidau a mi che tut ils schuldai, giuven e vegl, alla front dall’uiara en l’Ucraina, seigien religius, buca in dad els desisti u d’in maletg d’in sogn, da Niessegner, da Nossadunna ni d’in auter simbol religius sco schurmetg persunal el cumbat dall’uiara. In’uiara che cuozza gia 16 meins.