Veis era l’impressiun ch’ei detti dus Nadals? Ils 24 sera il Nadal cun tut quei ch’ins spetga: candeilas, il bambin, melodias ed odurs elevontas. E lu il gi da Nadal, pia ils 25 da december. Pia, dus Nadals.
Igl emprem Nadal s’orientescha vid igl evangeli tenor Lucas (mira Lc 2,1–20). Nadal ei igl affon Jesus ch’ei el pursepen da Bethlehem, Giusep e Maria, ils pasturs che vegnan sin viseta, ils aunghels che contan gloria. Quei ei igl emprem Nadal, il Nadal dil cor.
La dretga via ei da seschar enrihir dad omisdus Nadals, ton dil Nadal dil cor sco da quel digl entelletg.
Il secund Nadal ha igl evangelist Gion avon egl (mira Gn 1,1–18). Lez evangeli entscheiva cun in impressiunont himni: «All’entschatta era il Vierv, ed il Vierv era tier Diu, e Dieus era il Vierv». Quei himni ei genials, aber el ei era pretensius. El plaida dil Vierv, pia dil plaid – ni tenor il grec dil «logos» – ch’ei daventaus carstgaun. Quei ei il secund Nadal, il Nadal digl entelletg.
Mo ussa, tgei far cun quels dus Nadals? Ins savess gir ch’ins sto semplamein decider: U igl emprem ni il secund Nadal. Mo gliez corrispundess buc a nossa tradiziun cristiana e giudaica. La dretga via ei da seschar enrihir dad omisdus Nadals, ton dil Nadal dil cor sco da quel digl entelletg.
Quella via ei lu era la via per la cardientscha cristiana da mintgina e mintgin. Igl ei gie buc bien, sche nossa cardientscha ei memia teoretica ed ellas neblas, senza ch’ella vess in agir e secuntener concret. Nossa cardientscha semuossa en nossa tenuta ed en quei che nus fagein dil bien. Mo igl ei era buca bien, sche nossa cardientscha ei buca pli reflectada, pertgei ina sincera cardientscha enquera permanentamein igl entelletg (tenor Anselm da Canterbury).
Cun quella secunda dimensiun da nossa cardientscha stat ei actualmein buc memia bein. Lein perquei encurir, dumandar e cavar, pertgei el «logos» schai enzatgei fetg «logic».