Siglir tar il cuntegn

Header

audio
Pled sin via da Marcel Köhle
Or da Vita e cretta dals 28.01.2024. Maletg: Marcel Köhle
laschar ir. Durada: 3 minutas 32 Secundas.
cuntegn

Pled sin via «Duvrein nus insumma art?»

(sursilvan) Quella damonda ei ida tras il tgau a mi cura che jeu hai visitau igl atun vargau l’exposiziun dad Alberto Giacometti el Museum d’art a Cuera. Cura che jeu sun turnaus a casa lezza dumengia, hai jeu mirau entuorn en mia habitaziun e sun lu era sedumandaus co che quella vesess ora senza ovras dad art.

Mia habitaziun sco «kunstfreie Zone» fuss lu schon ualti freida e tresta.
Autur: Marcel Köhle Scolast e teolog

Per l’ina fussen tut las preits cun inaga niuas e la habitaziun perdess enzatgei da sia atmosfera caulda. E per l’autra, e quei sun jeu vegnius pér lu pertscharts, stuess jeu era allontanar tut ils regals en biro ed en stiva. Gie, tut ils cudischs che jeu hai rimnau els davos dus decennis ein era «ovras dad art» che carstgauns han creau cun bustabs e plaids! – E lu aunc la musica, tut quels discs cumpacts ch’ein en stiva savess jeu lu directamein fierer el canaster ed ei vegness lu fetg ruasseivel en miu dacasa e mintgadi. Mo era pintgas caussas, sco cadeinas dad aur, uras, vasa, candaliers ni era tut quellas caussas che mes scolars han zambergiau e malegiau, tut quei stuess jeu allontanar ord mias quater preits.

Mia habitaziun sco «kunstfreie Zone» fuss lu schon ualti freida e tresta ed ins sentess nuot pli da quella atmosfera caulda ch’ella ha per mei. Ella fuss mo pli aunc funcziunala, aber miu dacasa fuss ei buca pli…

Enzaco, e quei hai jeu sentiu lezza dumengia, drova il carstgaun art! Ed atgnamein eis ei era mess en tgina ad el dad esser creativs e crear ovras. Mirei mo inaga ils affons! Dei ad els tscheppa ni mettei els en ina sablunera e gia vegn ei baghegiau tuors e castials da sablun. Dei ad els colurs e pupi e schon dat ei pintgas ovras meisterilas…

Ch’ils affons ed insumma ils carstgauns han in inschign creativ ei era in patratg fetg biblic. Ualti all’entschatta dalla bibla, suenter che Dieus ha scaffiu il mund, vegn ei raquintau ch’el hagi creau ils carstgauns tenor sia semeglia. Sco Dieus ei artist ed ha fatg ovras, aschia ei era il carstgaun creativs, scaffescha ovras pintgas e grondas, e dat a siu mund, leu nua ch’el viva, ina tempra persunala.

Era sche nus essan buc artists da renum sco Alberto Giacometti e vein forsa era buc igl inschign da luvrar cun pennel e colur, essan nus tut creativs. Mirei e contemplei inaga, sco vus veis drizzau en vies dacasa. Quei ei vossa «ovra d’art», quei veis vus creau! – Jeu giavischel a vus schon ussa ina biala viseta e bunas uras en vies «museum persunal»!

RTR 08:45 Pled sin via

Artitgels legids il pli savens