«Allegra!» – «Schi chau! Tü est bain l’ami da Mengia?» – «Schi, be precis.» – «Flot da T’inscuntrar. Dingionder est tü? E che lavurast…?»
Schi, la lavur es importanta per nus! Cur cha’l Svizzer fa cugnuschentscha cun seis prossem, schi disch la statistica cha la seguonda dumonda dal discuors s’interessa fingià pel manster, per la lavur. «Che fast?» es per blers bod identic culla dumonda «chi est?».
Giodair la lavur da seis mans, quai es concess a l’uman devot.
Quai nu fa insè star stut: la lavur tocca pro l’uman daspö ch’el ha bandunà l’üert Eden: «Cun stainta dessast tü at nudrir da (la terra)…“ (Gen 3,17s.) nu tuna zuond entusiastic cur cha Adam ed Eva fan il pass our’in nos muond.
La Bibla fa però üna clera differenza tanter lavur ascha ed aspra, per exaimpel sco sclav i’l servezzan dal farao in Egipta (cg. Ex 1,14) e la lavur chi’s fa per seis agen bön ed in libertà.
I’l seguond cas es la lavur il meglder mez cunter la fom e la povertà; avair lavurà per nöglia, quai es mal, ma avair krampferià pel agen bön, quai es il böt da la buna vita da l’uman crettaivel.
«Tü vainst a giodair la lavur da teis mans; vantüraivel tü – tü avarast bun.» (Ps 128,2) – Quista furtüna imprometta il psalmist a quel uman chi maina üna buna vita davant il Segner. La lavur artschaiva in quella perspectiva la charta da nöblia. Giodair la lavur da seis mans, quai es concess a l’uman devot.
«Flot da T’inscuntrar finalmaing! E che lavurast…?» – Eu giod mia lavur d’eletriker, da magistra, da ravarenda, da bos-cher o da fliunza.
Giodair la lavur as poja, schi’s fa quella per l’agen bön, quai vaina uossa imprais, in libertà, e chi’s chatta üna perspectiva in quai chi’s fa. Schi la sfida, il svilup persunal e professiunal toccan pro. La cretta agiundscha l’aspet dal sen als criteris pel giodimaint da l’aigna lavur. Sen per exaimpel da contribuir alch pel bön d’oters o per ün bön plü grond: Cultivar il god da muntogna, fliar ad umans, inspirar ad oters, pisserar per confamigliars, schoglier problems tecnics tuot concret, pussibiltar üna bella vita a sias bes-chas ed amegldrar mincha di.
Schi: «Tü vainst a giodair la lavur da teis mans; vantüraivel tü – tü avarast bun.» (Ps 128,2) – E quai giavüscha a nus tuots cullas plü differentas lavuors, culs plü differents mansters. Amen.