Siglir tar il cuntegn

Header

audio
Unitad munta in vegnir perina, in respectar in l'auter.
Or da Vita e cretta dals 23.01.2022. Maletg: MAD
laschar ir. Durada: 3 minutas 18 Secundas.
cuntegn

Pled sin via «Ecumena – ina casa per tuts»

Il Pled sin via dals 23 da schaner vegn da Flurina Cavegn-Tomaschett da Breil, teologa ed assistenta pastorala.

Po dar ch’ins auda quels dis empau pli savens che schiglioc il plaid «ecumen/ecumena». Naven dils 18 tochen ils 25 da schaner ha numnadamein liug, sco mintg’onn, l’jamna d’oraziun per l’unitad cristiana. En differentas pleivs vegnan survetschs divins ecumens festivai nua che cristians uran da cuminonza per l’unitad denter las differentas confessiuns.

Mo tgei vul «ecumena» lu propi dir? L’expressiun deriva dil plaid grec «oikein», quei che munta «l’entira tiara habitada». Igl ei buc in plaid ch’exista pér dapi la reformaziun. Gia ils emprems cristians duvravan el e manegiavan cun quei l’entira baselgia. Sche nus plidein ozildi dall’ecumena, manegiein nus la relaziun denter las differentas baselgias confessiunalas.

La diversitad dallas differentas confessiuns para a mi ina rihezia dalla baselgia. Ella dat colur a nossa baselgia, tschenta differents accents.
Autur: Flurina Cavegn-Tomaschett Teologa

Sche carstgauns uran duront quell’jamna per l’unitad cristiana seregordan els dils plaids da Jesus che nus anflein egl evangeli da Gion: «Tuts duein esser units. Sco ti, Bab, eis en mei e jeu en tei, aschia duein era els esser units en nus» (Gn 17,21). Urar per quell’unitad munta denton buc urar per in’uniformitad cristiana. Unitad munta in vegnir perina, in respectar in l’auter, in veser quei ch’ei tuttina ni semegliont, denton enten schar esser l’auter aschia sco quei ch’el/ella ei. La diversitad dallas differentas confessiuns para a mi ina rihezia dalla baselgia. Ella dat colur a nossa baselgia, tschenta differents accents. Memia ditg han carstgauns cumbattiu encunter quella diversitad cristiana, quei che ha procurau e procura deplorablamein aunc adina per malapasch, disfidonza, concurrenza e foss.

Bugen cumparegliel jeu la baselgia cristiana cun ina famiglia che viva en ina casa. Dil reminent sebasa il plaid «ecumena» era sil plaid grec «oikos», quei che munta nuot auter che «casa». Sco quei che la diversitad da caracters, basegns e filosofias semuossa denter fargliuns che vivan sut in tetg, aschia semuossan quellas differenzas p.ex. era denter ils confamigliars evangelics, catolics, ortodoxs e libers. Impurtonta ei la voluntad da star en dialog, da tgirar las relaziuns. Impurtont eis ei era dad adina puspei vegnir pertscharts digl origin e dalla finamira communabla dalla famiglia: Quei ei Dieus, ch’ei per nus tuts schibein bab sco era mumma – nies dacasa.

RTR 08:45 Pled sin via

Artitgels legids il pli savens