(sursilvan) Jeu sun en iert vid zerclar. Ell’era il pli sisum ein enzacons paslers serimnai. Cun gronda canera fan els bogn el tratsch. Els schulan e sbattan las alas e paran cuntents, ventireivels ed engrazieivels. Els ni semnan ni raccoltan ed han tuttina tut quei ch’ei drovan – en pli ein els engrazeivels e cuntents cun quei ch’ei anflan.
Fuss quei bi sch’ei mass era aschi sempel cun nus carstgauns. Jeu quettel che igl engraziel va adina pli e pli vess sur las levzas. Pertgei duess jeu insumma esser engrazieivla en quei mund trubistgau? In mund plein uiaras e conflicts? In mund da daners e pussonza? In mund d’accidents e catastrofas? In mund, nua che mintgin vul dapli e dapli? E quella spirala negativa savess aunc cuntinuar e cuntinuar…
Persula sai jeu buca midar il mund. Jeu sai midar mia tenuta, miu agen agir, acceptar quei che jeu sai midar e vegnir activa gest cun sedumandar: Tgei fa lu mei cuntenta? Tgei dat a mi motiv dad engraziar?
Stop – quei cheu va ella fallida direcziun. Level jeu atgnamein buc engraziar? Aschi spert selai ins menar da patratgs negativs. E lu piard’ins il focus sin quei ch’ei bien, quei che fa bein a nus – igl impurtont. Quei che fa nus cuntents. Daco sai jeu buca semplamein viver cun quei che ei? Prender in exempel dils paslers? Dir a memezza: Ei dat caussas che salain buca midar. Persula sai jeu buca midar il mund. Jeu sai midar mia tenuta, miu agen agir, acceptar quei che jeu sai midar e vegnir activa gest cun sedumandar: Tgei fa lu mei cuntenta? Tgei dat a mi motiv dad engraziar? Midar la spirala negativa en ina vesta positiva, gliez fa bein, fa cuntents.
Engraziar ei ina gèst, esser engrazeivels ina tenuta. Aschia descriva la psicologia quei fatg. Ella pretenda schizun che carstgauns engrazieivels seigien pli sauns. Ed els fan bein a nossa societad. Sche tut fuss engrazieivels sco ils paslers cun quei ch’ei han, semidass lu nies mund? Para che igl esser engrazieivels ei impurtonts per ina buna ballontscha da tgierp ed olma, forsa era empau in trend. Pertgei ei dat da tuttas sorts tips e trics e schizun apps e cuors ellas medias socialas. Cheu vegn descret e discussiunau, tgei pass ch’ins sa far e tgei che gida nus da vegnir pli engrazieivels.
Per mei ei quei enzaco nuncapeivel. Pertgei drov’ins tals agids per enzatei che para schi sempel? Dependa ei dil tip, dil caracter? Ni han ins forsa piars empau l’engrazieivladad en la truscha dil mintgadi? Jeu vivel bugen, hai plascher da mia lavur, sun bugen da cumpignia, hai in dacasa, ina famiglia e sun sauna. Bein motiv avunda dad esser engrazieivla.
Jeu sai buca seregurdar che jeu hai enzacu giu il sentiment che zatgei maunchi a mi. Il sesentir bein ei segir buca vegniu da sesez. Quella tenuta hai jeu astgau sentir ed emprender el ravugl famigliar. Jeu hai giu da pign ensi buns exempels. Gest quei fatg – il bien exempel – gida nus magari dapli e quei senza gronds plaids. La tenuta che jeu portel anoviars ei sc’in spieghel. Ella reflectescha sil proxim. In carstgaun cuntent ed engrazieivel fa auters carstgauns cuntents. Ei drova gnanc bia. Sco mes paslers en curtgin. Els ein sgulai vi sil roser e spetgan uss da puder tier in tec graun – il pavel da nossas andas. Schulitgond seglian ei d’in rom a l’auter. Ed jeu selegrel tut cuntenta ed engrazievla dalla raccolta en miu iert.