Siglir tar il cuntegn

Header

audio
Pled sin via
Or da Vita e cretta dals 13.04.2022.
abspielen. Laufzeit 4 minutas 7 Sekunden.
cuntegn

Pled sin via Entgins patratgs per Venderdis sogn …

Oz festivein nus Venderdis sogn. En nossa tradiziun in di che nus seregurdein dalla mort da Jesus. La crusch stat el center.

Jeu seregordel bein vid ils plaids ord mi’affonza: «Mirei il lenn dalla crusch che porta salit al mund.» – Cruschs dat ei biaras, veseivlas e nunveseivlas en nies mund. Gliez ei capeivel. E «salit»? – «Heil» per tudestg?

Forsa s’avischinein nus al plaid «salit» cun agid da treis maletgs ord la via dalla crusch. Quels maletgs stattan el center dalla meditaziun dad oz.

E tgei fagein nus? – Nus essan consterni, vilai e savein egl emprem mument buca co reagar.
Autur: Andrea Cathomas-Friberg Catecheta

Gl’emprem maletg ei «Jesus croda sut la crusch». – Ils biars da nus ein gia stai en quella situaziun: jeu sun giun plaun, senza speronza, senza curascha e forza e senza perspectiva, daco adina jeu? – Tut para van, senza senn.

Oz patratgel jeu cheu era vid tut quels carstgauns che ston viver en situaziuns d’uiara e da fomaz. En special vid ils carstgauns ell’Ucraina che vivan en temas e suppressiun. Situaziuns vanas per nus tuts.

E tgei fagein nus? – Nus essan consterni, vilai e savein egl emprem mument buca co reagar. Il meglier en da quellas situaziuns ei da semplamein far. Vegnir activs. Activs sco Simon da Cirena che gida Jesus a purtar la crusch.

Nus vegnin en acziun. Ed acziuns ha ei dau biaras en nos vitgs. Igl ei in bi mirar co pign e grond segida. Cun bunas ideas vegn rimnau rauba e daners. Ei semuossa ina gronda solidaritad cun quels carstgauns che piteschan. Ei va a nus datier.

Quella solidaritad fa nus pli rehs. Suenter liung temps, nua che mintgin ei staus empau da siu persei, dat ei nova cuminonza. Ei dat sentupadas ed il segidar fa bein, quietescha e lai anavos fastitgs. 

Era quella situaziun anflein nus ella via dalla crusch. Veronica porscha spontanamein in sudari a Jesus. Lez imprima sia fatscha, lai anavos fastitgs. Quels fastitgs consoleschan, dattan forza e curascha. Cun nossas acziuns spontanas savein nus zvar buca midar gl’entir mund. Mo, daguot e daguot fan puoz – nus midein enzatgei el pign mund. Nus dein speronza e formein cuminonza. Nus vivin quei che nus desiderein. Numnadamein il viver en pasch.

Atgnamein fuss tut schi sempel. Nies esser, nies tgierp ei gia program. Veis vus gia fatg persenn che vus saveis, cun vies tgierp, formar ina crusch?

Stei inaga sin peis ed arvei vossa bratscha. – Enragischaus cun la tiara stun jeu cheu sidretg. Miu tgau sestenda viers gl’univers, colligiaus cun Diu. Mia bratscha stendida colligia mei culs carstgauns, cugl entir mund. En miu esser sun jeu colligiada, jeu piardel buca il sutapeis. Jeu vegn tenida e purtada. In bi maletg, la crusch piarda la stgiradetgna dalla mort e fa plaz alla speronza, alla glisch.

RTR Pled sin via 08:45

Artitgels legids il pli savens

Scrollar a sanestra Scrollar a dretga