(sursilvan) In liug plein plontas. Quater flums. Ina dunna ed in um. Ei han tut quei ch‘ei drova per viver. La dunna entaupa in animal intelligent: ina siarp. Ellas discuoran dalla plonta enamiez igl iert – la plonta dall’entelgientscha dil bien e dil schliet. Ei seigi scumandau da prender da gliez fretgs, sa la dunna. Tgi che magli, stoppi murir. Mo la siarp ha autras informaziuns pertuccont ils fretgs da quella plonta: negin mieri. Il cuntrari, tgi che gusti da quels fretgs emprendi da distinguer denter il bien ed il schliet.
Quella historia dad Eva e dil meil enconuschis Vus pli probabel. Mo Eva ha mai survegniu in meil dalla siarp. Il cuntrari. La siarp ha buca dau in meil ad Eva, mobein in auter meini pertuccont ils fretgs scumandai. Ha la siarp pia lubiu ad Eva da sviluppar in agen meini? Ha ella aschia anflau la curascha necessaria per surpassar ina regla da Diu? Per schar davos ella la tema da murir ed anflar la veglia da viver sia atgna veta?
La siarp ha buca dau in meil ad Eva, mobein in auter meini pertuccont ils fretgs scumandai.
Adam hagi mintgacass bugen priu dils fretgs che Eva hagi dau ad el. Ensemen seigien ei i ord il parvis ed hagien stuiu cumbatter per lur atgna existenza, cun tuttas sfidas dalla lavur sil prau – mo era plein plascher dalla raccolta. Cun tut il mal che vegn cun ver agens affons – mo era il gaudi e la luschezia che gliez portan ella veta dils geniturs.
Mo, tgi ei insuma Adam? E tgi ei Eva? Sche nus translatein Adam cun «carstgaun» ed Eva cun «veta», lu setschentan interessantas damondas: Tgei munta ei per in carstgaun e sia veta da gustar ils fretgs dall’entelgientscha denter bien e mal? S’auda ei tier la veta da mintga carstgaun da viver ina veta tenor sias atgnas decisiuns? D’eleger in partenari ni ina partenaria ch’ins sa parter la veta e ver agens affons? Ei il prezi per ina veta tenor l’atgna veglia en libertad da ver bunas fasas en veta, mo era schliatas fasas? Ina caussa para segira: Saver distinguer denter bien e mal ei buc adina aschi sempel. Ei drova magari pliras emprovas ni schizun in’entira veta per ch’ei gartegi al carstgaun da viver ina buna veta.