(Sursilvan) La fin d’jamna sundel puspei staus en sortida. Tgei sera!
Buns amitgs ed amitgas, drinks, interessantas discussiuns e super musica che ha schau saltar e festivar nus tochen las 5 la damaun. Cun auters plaids, ina sera geniala che ha fatg bein al cor, al spért ed al tgau. Also entochen che sun sedestadaus e sentiu miu tgau a pitgar.
Cun beiber in caffè e leger la gasetta, vaiel puspei realisau che buc tuts han saviu saltar e festivar da buna cumpignia.
Jeu hai realisau, ch’auters han era mal il tgau. Denton buca dil tissi alcoholic sco jeu, mobein pervia da bumbas, explosiuns e barschaments che mudregian tschienmellis en nossas tiaras vischinontas: Sdrema da Gaza, Ucraina, Russia, Israel. Nus essan vid saltar, ed auters vid pitir, grir, bargir – surviver.
Nus gudin shots vid la bar, duront ch’auters vegnan confruntai cun auters shots – ils siets da pistolas e buis.
Nus essan vid cantar el club tier il classicher da Tom Jones «sex bomb», duront ch’auters greschan amiez la notg «bomb!» – ferton che bumbas crodan ella casa dil vischin.
Nus empustein in Moscow Mule, duront ch’il survient fa beffas e di ch’els hagien midau il num dil drink sin Kiev Mule.
Sin via a casa, tras il Welschdörfli a Cuera, datti sco usit aunc in bien falafel cun humus tier nies imbiss favorit. Achmed mira duront preparar nies snack, las novitads da sia tiara Palestina sil visur che stat sur la teca. Nus murdin pia el falafel, schein digrar la sosa sil taglier, duront ch’ils Palestines ella televisiun laian digrar daguots da saun silla via da sablun.
Cuort avon ch’arrivar a casa, mondel sper il baghetg ora, che dat albiert a fugitivs. Sur mei sgolan utschals e columbas. Avon la casa da fugitivs stattan trais autos cun numeras ucrainas. Sin in auto stat in sticker d’ina columba da pasch. Tgei casualitad.
Jeu sundel buca segirs, sch’jeu duessel momentan festivar, saltar e guder il mintgadi sco sch’ei capitass nuot sin quei planet. Forsa stossel simplamein esser engrazieivels, ch’jeu vivel cheu en pasch. Jeu sai sco buca far las massas per quels milliuns persunas che sempon gie era buca da lur discletg. Forsa stossel semplamein sedar giu cun nies plunder che nus vein che marscha cheu. La finfinala vegni gie scret dapertut, ch’ei mondi schi sgargscheivel cun nus: tscheins che s’augmentan, cassas da malsauns ch’explodeschan, inflaziun ed in clima che va sutsu. Quei ei gie avunda nausch, vegni detg, ni buc?
Co savein nus carstgauns viver cun quella malgiustia?
Jeu hai negina risposta, mo probabel ei quei in mecanissem automatic che funcziuna detg bein. Ei fuss gie buca prudent, sche tuts semischedassen en ellas dispetas d’auters. Magari caschuni dapli ruaus, sch’ins lai far ils auters ed emprova da tener en roda nies mund schi bein sco pusseivel.
Jeu vegnel pia era vinavon a saltar e festivar. La proxima gada denton buca mo per mei, mobein era per tut quels e quellas ella Palestina, egl Israel, ell’Ucraina e la Russia, ed en tut tschellas tiaras d’uiara, che han negin motiv da festivar. Il proxim sault va sin vus.
Ivo Orlik frequenta actualmain il studi da scolast primar a Cuera. Ils davos onns ha el lavurà sco creative director en in’agentura da social media. Durant 5 onns ha il Sursilvan lavurà en chasa RTR sco moderatur da radio e dal Minisguard. Sper la lavur è Ivo activ en la musica rumantscha sco «Giganto» e procura cun ses texts per discussiuns. En ses temp liber scriva el gugent istorgias curtas.