(Sursilvan) Cara Flurina,
cun tiu «Pled sin via» dall’jamna vargada has ti mussau si a nus las parallelas denter il trenament dil tgierp e quel dall’olma. Ti has scret che omisdus trenaments seigien impurtonts per nies beinstar, mo ch’ei gartegi als centers da fitness enzaco meglier da mobilisar la glieud. Tgei ch’els fan meglier che la Baselgia, sin quei hai jeu buca propi ina risposta definitiva. Mo tuttina vi jeu parter cun tei ed era cun vus, caras lecturas e car lecturs, in pèr patratgs che han accumpignau mei tras la jamna vargada.
Mo sco mintga center da fitness stuess la Baselgia sedumandar sche sia purschida seigi aunc adattada ed actuala per ils carstgauns d'ozildi ni plitost per ina clientella dil 19avel tschentaner.
In patratg che vegneva adina puspei endamen a mi, era quel dall’individualitad. Ils centers da fitness plidentan tei sco individi! Aschia porschan els a ti programs adattai a tes basegns, ti decidas davart l’intensitad dil program e con bia che ti lesses trenar. E sche ti lesses, sas ti era haver in instructur che accumpogna tei en tes exercezis e quei la damaun, da miezdi ni era la sera, aschia sco ei constat per tei. El dattan veramein a ti il sentiment: nus essan cheu per tei, per tia sandadad e per tiu beinstar!
La Baselgia perencunter secumporta mintgaton sco ina uniun sportiva d’avon 100 onns: inaga ad jamna vegnan ins ensemen, stat en retscha e tuts fan suenter ils «excercezis» ch’il «primgimnast» muossa avon. En quella cumparegliaziun vegn’ei veseivel che la Baselgia accentuescha plitost il collectiv ch’igl individi. Era sche la cuminonza ei enzatgei fetg constitutiv ed impurtont per igl esser dalla Baselgia, astga ella tenor miu pareri buca piarder igl individi ord vesta.
Cara Flurina, la Baselgia sto puspei plidentar pli fetg mintgina e mintgin en sia individualitad e dir ad els: nus essan cheu per TEI e nus sustenin TEI el trenament dall’olma. – Per quei intent stuess la Baselgia haver avunda bunas instructuras e buns instructurs ch’ein cheu per la glieud che less entscheiver cul trenament dall’olma, ni che druvass tips e sustegns da «profis».
Plinavon vess la Baselgia ils loghens adattai ed era avunda «urdeins da trenament» sco oraziun, meditaziun, cant, lectura, silenzi, ed aschia vinavon. Mo sco mintga center da fitness stuess la Baselgia sedumandar, sche sia purschida seigi aunc adattada ed actuala per ils carstgauns d’ozildi ni plitost per ina clientella dil 19avel tschentaner.
E sco davos input: il trend da far sport e fitness, quel ei buca vegnius dad oz sin damaun. Ei ha duvrau carstgauns che han fatg sur onns e decennis lavur da perschuasiun. Semegliont fuss quei era tier il trenament dall’olma. Ei drova ella Baselgia glieud ch’ei fiug e flomma per la caussa, che perschuada ed ha la curascha da muossar quei. Sch’ins ha sco Baselgia bunas purschidas, lu astg’ins era tschintschar da quei. E cheu giavischass jeu dalla Baselgia mintgaton empau dapli curascha, tut tenor il motto: «Fai dil bien e tschontscha surlunder!»