Las chanzuns da Nadal n’haja amo ill’uraglia. Eu n’ha jent l’ambiaint, cur cha blera glieud chanta insembel. Ed al listess mumaint m’occupa l’impissamaint da la canera da guerra, da bombas chi croudan dapertuot sül muond. Ill’Ucraina es la guerra ida inavant dürant tuot il temp da Festas. Daraja eir là ün conflict chi düra plü lönch?
In connex cul conflict in Palestina n’haja let üna vouta ün commentar d’ün reporter chi ha scrit dals uffants in Palestina: «Quists uffants nun han mai passantà ün temp sainza guerra. I vivan illa miseria, in privel da vita, in violenza chi po escalar dandettamaing. Quai es normal per quists uffants. I nu cugnuoschan nügl’oter.»
Eu vögl savair da las visiuns e dals sömmis – dad uffants sco eir da bazegners e nonas.
Ün ravarenda chi lavura ill’ospidal s’ha dumandà, scha quists uffants in Palestina, in Etiopia, in Corea dal Nord, in Afganistan o ingio chi’d existan talas crisas permanentas hajan amo üna funtana da la pasch dad alch varts. Da che s’insömgian quists uffants? Che visiuns hana? E’l ravarenda ha exprimi sia spranza cha quists uffants hajan nonas e bazegners chi tils quintan chi haja dat eir oters temps. E chi detta amo chanzuns chi dechantan üna tala brama e chi raquintan istorgias dad umans chi han amo üna superbgia. Ed el ha constatà cha cur chi nun existan üna vouta plü purtrets da la pasch, da sgürezza, da protecziun e salvezza, cha las ormas da quists uffants sumagliaran ad ün desert.
Ed eu n’ha realisà danövmaing: La buna nouva da l’istorgia da Nadal nu tocca be als cristians. Ella pertocca a tuots umans chi han il desideri d’avair pasch. Quel desideri collia umans sur cunfins, naziunalitats e religiuns oura. In tala maniera vaina da quintar las istorgias, da chantar las chanzuns.
In üna situaziun sumgliainta d’eira fingià il profet Joel chi ha eir vivü in ün temp inquiet plain guerra e violenza, blers ons avant Cristus. Ed el ha previs cun sia nouva cha glieud veglia s’insömgiarà e glieud giuvna varà visiuns. Il spiert da Dieu pussibilitescha tenor Joel quai.
Che bel impissamaint da s’insömgiar insembel, tuot las generaziuns! Eu vögl savair da las visiuns e dals sömmis – dad uffants sco eir da bazegners e nonas. Per cha gnanc’ün’orma nu sumagliarà üna vouta ad ün desert!