Siglir tar il cuntegn

Header

audio
Pled sin via dad Andrea Cathomas-Friberg
Or da Vita e cretta dals 10.12.2023. Maletg: Andrea Cathomas-Friberg
laschar ir. Durada: 3 minutas.
cuntegn

Pled sin via «Glisch e stgiraglia, stgiraglia e glisch»

(sursilvan) Jeu sesel en stiva caulda e gaudel, cun ina scadiola te enta maun, la ruasseivladad dalla sera. Sper mei tarlischan las duas candeilas da nies tschupi d’Advent. Ina glisch brausla e falombra. Buca da cumparegliar cun tut las glischurs e tarlischurs en nos vitgs e marcaus. Denton ina glisch caulda che dat in’emperneivla atmosfera en stiva. Jeu hai fetg bugen la glisch da candeilas. Quella quietescha suenter in liung di da lavur. Ella dat tempra festiva, envida da star in mument da cumpignia ni da star quiets e far ses patratgs.

Ei dat ei muments da tristezia, nua che tut para van. Muments nua ch’il buordi dil mintgadi smacca nus a funs.
Autur: Andrea Cathomas-Friberg Catecheta

Quella glisch – e seigi ella aschi pintga, brausla e falombra – vul dir a nus enzatgei: Eis ti era gia sedumandaus tgei ch’ella munta insumma?

Fisicalmein ei la glisch ina tarlischur electromagnetica. Nos egls san tschaffar mo parzialmein quella tarlischur… – Mo fisica ei buca propi miu camp preferiu. Perquei tuornel anavos tier nossa glisch brausla en stiva. Lezza ei per mei pli interessanta.  Ha glisch ozildi aunc ina muntada en nossa veta, nies mintgadi?

Enzatgei sai jeu da dir: Glisch e stgiraglia s’audan ensemen. Glisch, ei mo veseivla el stgir. Glisch drova il cuntrast. Per nus e nies mintgadi munta quei forsa: Tgi ch’enconuscha la stgiraglia dalla veta po era veser la glisch.

Pli spert detg che fatg. Adina puspei dat ei muments da tristezia, nua che tut para van. Muments nua ch’il buordi dil mintgadi smacca nus a funs. Muments trubistgai, nua che nus pudein buc alzar nies tgau e gnanc veser la glisch al horizont. Malgrad la tarlischur d’Advent, malgrad Nadal…

Dapertut ed adina dat ei carstgauns che vivan el stgir, che han piars la fidonza e speronza, ch’ein trests e persuls. Muenta quei ils carstgauns che vivan ella clarezia? Ein els pertscharts da quei fatg? Sefan els en che la glisch glischa buca per tuts tuttina?

Ei drova buc adina candeilas ni pérs da cazzola. Na, arva tes egls! Fai stem da tiu contuorn e seigies ti glisch per tes concarstgauns. In bien plaid, ina paterlada, parter temps, ina carta, ina sentupada, Gie, ei drova propi buca bia. Silpli empau curascha da far in emprem pass: Parter ina glisch, gliez ei era buca bia. Partan denton biars quella, lu vegn nies mund empau pli clars!

En quei senn giavischel a vus tuts e tuttas in bi e grazius temps d’Advent.

RTR 08.45 Pled sin via

Artitgels legids il pli savens