Siglir tar il cuntegn

Header

audio
Pled sin via da Silvia Gartmann
Or da Vita e cretta dals 28.05.2023. Maletg: MAD
laschar ir. Durada: 3 minutas 5 Secundas.
cuntegn

Pled sin via Hiob

(sursilvan) Sche Jesus ei morts, ei lu Dieus denter nus? Sche mintga novitad che contonscha nus ei schliata, exista lu Dieus insumma? Sche nus perdin sezs tut, schizun la sanadad, strufegia lu Dieus nus? Da Tschuncheismas han ils giuvnals viu: Il spért da Jesus viva vinavon denter els. Mo ei quella segirtad adina denter ils cartents? Oz vulein nus dar in’egliada el cudisch da Hiob – dil reminent in dils pli grevs cudischs ord il Veder Testament.

Hiob ei in um religius, gest e beinstont. Mo tuttenina piarda el tut. Sias 500 vaccas, ses 500 asens, ses 3000 camels e ses 7000 tschuts vegnan rubai da differents pievels ni dil fiug – ed ils luvrers mazzai. Ses affons mieran en ina casa che croda dapart duront ina tempiasta. Cuort sissu piarda Hiob era sia sanadad, siu entir tgierp ei cuvretgs da nauschas carschientschas. Ei dat ina fasa nua ch’el giavischa da mai esser staus naschius ni che Dieus munglassi schar mierer el. Las spisas gustan buca pli. Durmir dierma el mal.

Daco laias ti pitir mei?
Autur: Silvia Gartmann Scienziada da religiun

Sia dunna e ses amitgs analiseschan sia veta per anflar ils sbagls ch’el ha fatg – ei sto dar ina raschun che giustifichescha tut quei mal. Dieus strufegia mo ils schliats, creien els. Mo adumbattan. Ei anflan buca in sbagl. E Hiob manegia enviers sia dunna: «Dieus ha dau bia dil bien a nus. Gliez vein nus priu bugen. Il nausch s’auda era tier la veta. Era gliez eisi da prender.» Cu ei vegn mender e mender, hadregia Hiob cun Dieus: «Daco laias ti pitir mei?»

Dieus dat negina risposta sin sia damonda. La raschun daco che Hiob ha da pitir stat el stgir. Mo Dieus dat in’autra risposta ad el. Dieus dat da capir a Hiob ch’il carstgaun sappi buca veser davos il raschieni da Dieus. La pussonza da Dieus sappi il carstgaun gnanc s’imaginar. El dueigi pia buca manegiar da saver capir Dieus. Mo el dueigi calar da selamentar, star si ed entscheiver da puspei esser quei um gest ch’el seigi staus.

Quei fa Hiob. Ed el daventa danovamein beinstonts, ha aunc inaga ina gronda famiglia e reparta pli tard sia ierta recliamein denter fegls e feglias. – Ei alla fin pia tut bien? Ni eisi sco carstgaun semplamein grev da muganar ch’ei sa dar fasas ella veta ch’il pitir ei realitad – in pitir senza raschun, in pitir senza senn? – Era ils giuvnals han pitiu. Mo era els han realisau: pitir s’auda tier la veta. Lein levar en pei e viver.

RTR 08:45 Pled sin via

Artitgels legids il pli savens