Siglir tar il cuntegn

Header

audio
Pled sin via
Or da Vita e cretta dals 29.08.2021.
laschar ir. Durada: 03:20 minutas.
cuntegn

Pled sin via I Have a Dream – 58 ons plü tard

«I Have a Dream», quai ha dit Martin Luther King als 28 avuost 1963. Pacas frasas sun rivadas da transfuormar il muond daspö 58 ons sco quists quatter pleds. Egualità sociala, economica, politica e legala per nairs ed albs es statta la pretaisa dal discuors da quella jada a Washington. Sco ün refrain as repetta l'exclamaziun «I Have a Dream» dürant il discuors suot il Lincoln Memorial davant 250 000 persunas. «I Have a Dream» ha mobilisà las massas ed ha müdà la società – ed es tantüna restà ün sömmi fin hozindi. «Eu n'ha ün sömmi» es il contrast radical al muond real da quella jada ed es restà ün contrast eir i'l muond dad hoz. «I Have a Dream» sumaglia al semin da la mustarda illa sumaglia da Gesu. El cuntradischa a la realtà actuala e porta in sai fingià la realtà nouva. Il sömmi es il semin, our dal qual po crescher ün muond nouv. El disch cha la realtà actuala nun ha l'ultim pled.

Eu n'ha il sömmi cha'ls umans taidlan ün sün tschel, invezza da's ferir cun pleds.
Autur: Stephan Bösiger

Ed hozindi? Eu n'ha ün sömmi. Eu n'ha il sömmi cha'ls umans taidlan ün sün tschel, invezza da's ferir cun pleds. Eu n'ha il sömmi cha argumaints valan alch illa discussiun, invezza da las parolas vödas. Eu n'ha il sömmi cha mincha singul surpiglia sia part da la respunsabiltà per sai svess e per la società, invezza da muossar via sün tschel. Eu n'ha il sömmi cha la diversità vain vissa sco inrichimaint per tuots, invezza dad ün'imnatscha. Eu n'ha il sömmi cha la prestaziun da mincha singul uman survain la stima ch'ella merita, invezza da l'intunaziun dals deficits e sbagls persunals. Eu n'ha il sömmi cha nos muond es capabel da's transfuormar, invezza chi gnia cementà ün passà chi per part es surpassà. Eu n'ha il sömmi cha minchün vain respettà sco uman, invezza da gnir sbüttà per seis esser.

Ma bain: Forsa nu sun meis sömmis voss sömis, e voss sömmis na ils meis. Quai nun es però quai chi decida. L'essenzial es cha nus imprendan darcheu dad avair sömmis e da tils exclamar i'l muond, da tils exprimer e da tils dar ün fuond per ch'els possan dvantar realtà.

Martin Luther King ha muossà avant 58 ons cha s'insömgiar nu manaja da durmir, a l’incuntrari. El es i tras il muond cun ögls averts ed ha sdruaglià cun seis sömmis las massas, per transfuormar il muond. Quai ch'el ha exclamà quella jada pudess esser per nus l'invid per sömgiar inavant – cun sens svagliats baininclet – per cha'l muond possa as transfuormar.

In quel sen: Buns sömmis a tuots!

RTR 08:45

Artitgels legids il pli savens

Scrollar a sanestra Scrollar a dretga