(sursilvan)
Il dialog intercultural ei necessaris ed impurtonts. El porscha in grond survetsch als carstgauns per saver viver en pasch. Malgrad discuors e discussiuns sai dar tensiuns e conflicts. En quei connex lessel menziunar la situaziun el Niger ell’Africa. Leu vulan indigens buca surprender posiziuns da responsabladad ell’economia. Entras quei vegnan posts impurtonts occupai dad immigrants. Quei fatg caschuna tensiuns denter indigens ed immigrants.
Biaras tiaras vegnan confruntadas cun pliras culturas che pon caschunar grondas dispetas e tensiuns. Cura ch’ei va en quels conflicts buca mo per differenzas culturalas, mobein era per conflicts religius, fineschan quellas dispetas savens en uiaras.
In proverbi di «Nus Svizzers havein inventau las uras – mo ils Africans il temps».
Discussiuns denter persunas dalla medema cultura e dalla medema religiun ein segir pli semplas che discussiuns cun persunas dad in’autra religiun.
Mo quei che pertucca la religiun dat ei per part fatgs plitost culturals che religius che caschunan tensiuns. In exempel ei l’interpretaziun da cudischs religius che san schizun esser in motiv per uiaras politicas.
Bugen seregordel jeu vid mias experientschas duront miu temps da lavur. Tier las sesidas internaziunalas che havevan liug mintg’onn, serimnavan magari delegadas e delegai da 26 differentas tiaras entourn la meisa rodunda. Per mei era ei dètg interessant da vegnir en contact cun pliras naziuns, differents lungatgs ed enconuscher lur ponderaziuns. Quei ch’ei dau a mi ualti spert en egl era il fatg, co entginas collegas e collegs mavan entuorn cul temps. Pia, co els interpretavan la punctualitad. Quels dall’America dil Sid schevan bugen spitgar nus. Ferton che nus Svizzers sco era nos vischins, ils Tudestgs ed ils Austriacs, eran adina fetg punctuals. Quei curdava veramein si.
Segir eis ei stau in avantatg che negins representants dall’Africa prendevan part da nossas reuniuns, schiglioc fuss ei forsa iu aunc pli ditg avon che nus havessen saviu entscheiver. In proverbi di «Nus Svizzers havein inventau las uras – mo ils Africans il temps».
Ussa giavischel jeu per la fiasta dil di dalla mumma bia temps allas mummas per festivar, discussiunar e parter lur temps ensemen cun lur cars el ravugl dalla famiglia.