Veis Vus inaga telefonau sil numer «0031 6 442 449 01»? – Probabel buc. Mo sche Vus vesses telefonau igl onn 2009 sin quei numer, lu vesses Vus udiu la suandonta annunzia: «Bien di! Quei ei la colligiaziun telefonica da Diu. Ual ussa sai jeu buca prender encunter vies telefonat. Fagei aschi bein e schei anavos ina notizia ni empruei ei aunc inaga pli tard. Forsa survegnis lu schizun ina risposta.»
Bien di! Quei ei la colligiaziun telefonica da Diu. Ual ussa sai jeu buca prender encunter vies telefonat. Fagei aschi bein e schei anavos ina notizia ni empruei ei aunc inaga pli tard. Forsa survegnis lu schizun ina risposta.
Davos quella acziun cun il rispundider steva igl artist hollandes Johan van der Dong. Cun quei project artistic ha el vuliu metter l’oraziun en in connex pli modern e dil mintgadi. El ha vuliu muossar che Dieus ei contonschibels e quei adina e dapertut. – Sco igl artist ha lu detg en ina intervesta, ha il telefon scalinau incuntin. Suenter in cuort temps veva ei gia varga 100 messadis sin il rispundider. Mo quels messadis ein denton buca vegni tedlai. Igl artist ha stizzau quels cun la remarca: «Era per Diu vala il secret dalla communicaziun!»
Quella acziun artistica (ed era empau humoristica) muossa tgei che urar munta: L’oraziun ei atgnamein nuot auter ch’in discuors denter carstgaun e Diu. Mintgin da nus astga clamar, plidentar e vegnir en contact cun el. Dieus ei dapertut contonschibels ed ins sa adina «deponer» ils messadis persunals tier el.
Mo per mei persunalmein ei l’oraziun aunc dapli che mo in discuors. Tras l’oraziun dat ei cuminonza cun Diu, ed era cun tut ils auters carstgauns che fan oraziun. Urar colligia, era sch’ins ei lunsch in ord l’auter. Urar dat forza e solidaritad, surtut ella grevas situaziuns dalla veta. – Quei vesin nus era actualmein, en in temps, nua che biars fan oraziun per ils carstgauns ch’ein pertuccai dall’uiara ell’ Ucraina. Cheu ei l’oraziun in segn ch’ins ha buca emblidau els e ch’ins ei cun cor e patratgs datier dad els.
Ual en da quellas situaziuns grevas ein biars surdumandai cun l’oraziun. Els sedamondan co e tgei ch’els dueien urar. Co fan ins «endretg» oraziun? – Ell’oraziun dat ei buca in endretg ni falliu! Mintgin da nus astga e duei urar en sia atgna moda e duei purtar avon Diu quei che muenta el ni ella. Mo in pign cussegl sai jeu tuttina aunc dar: Per quei pass drova ei negina numera da telefon. Ei drova sulettamein in cor aviert! – Ed aschia giavischel jeu a Vus schon ussa: in bien discuors cun Diu!