Siglir tar il cuntegn

Header

audio
Pled sin via
Or da Vita e cretta dals 27.01.2022. Maletg: RTR
laschar ir. Durada: 3 minutas 45 Secundas.
cuntegn

Pled sin via Ils papas ed ils animals

Papa Leo X che ha viviu avon 500 onns, veva in fetg bien amitg cun num Hanno. Ei era in amitg ch’el veva da cor bugen. Ed ei vegneva schizun raquintau ch’igl entir marcau da Ruma hagi carezau Hanno. El era per aschidadir il «superstar» dil Vatican. Hanno era siu animal da casa e tgei che fa forsa surstar nus: ei era in elefant ord l’India.

Igl elefant Hanno ha Papa Leo survegniu sco schenghetg dil retg portuges a caschun da sia intronisaziun. Dapi lu ha el mirau da Hanno, ha puppergnau el e fatg tut per el tochen ch’el ei morts ella vegliadetgna da sis onns. Da lez temps raquintav’ins che papa Leo eri nundetg trests ed vevi bargiu grossas larmas per siu animal carezau. Papa Leo vevi carezau Hanno sco in commember dall’atgna famiglia.

Tgei valur han ils animals en nossa cardientscha?
Autur: Marcel Köhle Scolast primar

Jeu stoi conceder che jeu hai stuiu surrir cura che jeu hai udiu questa historia per l’emprema gada. Mo sche jeu patratgel suenter, lu ei quella historia buca aschi lunsch naven da nossas realitads modernas. Contas persunas carezan lur animals da casa sco in concarstgaun ni forsa schizun aunc dapli? Per cons possessurs ein lur tgauns ils megliers amitgs?

Haver bugen animals da casa ei enzatgei fetg normal. Era per ils umens dalla Baselgia! Aschia veva papa Benedetg XV quater pèschs en in aquari ch’el numnava ses pli gronds amitgs. Papa Pius XII ha giu dus utschals canaris ch’el ha schau sgular entuorn duront las tschaveras. Ed era da Benedetg XVI vegn ei raquintau ch’el seigi in grond amitg dils gats. – Quellas pintgas anecdotas muossan a nus ils umens dalla Baselgia, che paran mintgaton dad esser distanziaus, d’ina vart zun simpatica e humana.

E cheu sun jeu era sedumandaus: Tgei valur han ils animals en nossa cardientscha? Ei la carezia enviers ils animals mo in bi supplement ni s’udess quella tier las petgas fundamentalas da nossa cardientscha, sco la carezia enviers Diu e la carezia proximala?

Ual sin quellas damondas ha papa Francestg adina puspei fatg attents. Ei seigi ina obligaziun da mintga carstgaun da carezar la scaffiziun. Sche Dieus seigi il scaffider digl entir mund, lu eis ei nies duer da carezar, respectar e proteger la scaffiziun culla natira e tut ils animals. L’entira scaffiziun ei per aschidadir la gronda famiglia da Diu.

E cheu ei mintgin da nus dumandaus co el ni ella tracta ses confamigliars. Forsa vala ei la peina da far puspei inaga in pèr patratgs sco vivin las valurs da respect, toleranza e carezia enviers la scaffiziun, tuttina sch’igl ein carstgauns, tgauns ni gats, ni schizun elefants sco tier papa Leo X.

RTR 08:45 Pled sin via

Artitgels legids il pli savens