Atgnamein massen mes patratgs meglier a prau el temps da primavera, en connex cun la fiasta da Pastgas. Denton, la stagiun da skis e la novitad ch’il niev dress dall’equipa naziunala porti il num «levada» ei uss actuals. E leutier – probabel vegn la levada dil sulegl mai spitgada cun tonta brama sco el meins dil december cun sias notgs liungas.
En mintga cass hai jeu tschaffen che Wendy Holdener ha finalmein gudignau siu emprem slalom dalla cuppa mundiala en in vestgiu cun in num romontsch. Jeu sai bein ch’il num «levada» ei sulet in instrument da reclama dil niev sponsur principal che porta era il num «levada dil sulegl» («Sunrise», remarca redacziunala), mo en in auter lungatg. Plascher hai jeu perquei tuttina dil num romontsch ed jeu sperel ch’il dress porti cletg ed animeschi las atletas ed ils atlets svizzers dad adina puspei levar si. Curdadas e terradas s’audan numnadamein tier lur mintgadi.
Plascher hai jeu perquei tuttina dil num romontsch ed jeu sperel ch’il dress porti cletg ed animeschi las atletas ed ils atlets svizzers dad adina puspei levar si. Curdadas e terradas s’audan numnadamein tier lur mintgadi.
Sco teologa hai jeu denton aunc fatg in’autra associaziun en connex cun quei plaid. Levada ei per mei era in plaid religius. In che muossa vi sin la levada da Cristus e dils defuncts. La levada – buca per schar davos nus la notg ed entscheiver in niev di, mobein la levada per schar davos nus la mort ed entscheiver ina nova veta – ina veta tier e cun Diu. El senn da cardientscha train numnadamein tut ils cristians en a caschun dil batten in niev dress cul num «levada». Quei patratg va anavos sin sogn Paul e siu citat en la brev als fideivels da Galazia, nua ch’el scriva: «Vus tuts ch’essas battegiai en Cristus, veis tratg en Cristus» (Gal 3,27).
Igl ei in impressiunont maletg, quel dil «trer en Cristus». Cun trer en Cristus essan nus ina cumpart dad el participein aschia era a sia levada. Nus s’udin tier sia squadra e purtein il dress da speronza e carezia.
Interessant ei era che s. Paul scriva en in’autra brev: «Batta il bien cumbat dalla cardientscha … e gudogna il premi dalla veta perpetna» (Tim 6,12).
Ins sa pia sedumandar, schebein il niev sponsur, che s’auda tier la branscha da communicaziun, ha forsa era in Paulus en siu cussegl d’administraziun? Jeu giavischel ina biala dumengia!