L’apostel Paulus scriva in üna charta:
Ingio chi’d ais il Spiert dal Segner, là ais libertà. (2 Cor 3,17)
E listess haja dürà fin il 1526 chi’d es gnüda declerada per la prüma jada la libertà da cretta in ün stadi da l’occidaint cristian, e quai sül territori da las Trais Lias. Güst ils cristians san daspö l’ura da naschentscha da lur cretta quant chi’s po patir suot la perseguitaziun causa sia fai. Fingià illa Bibla chattaina passaschas chi dan perdütta da la violenza, culla quala cha l’imperi roman cumbattaiva las prümas raspadas cristianas e quai fin a l’imperatur Constantin. Eir scha quai füss statta üna buna basa per as metter aint per la libertà da cretta, nu sun las societats cristianas dürant tschientiners ingün lö da libertà in quel reguard. Apunta fin l’on 1526.
Ingio chi’d ais il Spiert dal Segner, là ais libertà. (2 Cor 3,17)
Chi vain proclamada la prüma jada la libertà da cretta, ha da chefar cull’istorgia particulara da las Trais Lias e da la refuorma illa Rezia da quel temp. Oter co in oters lös, ingio cha ducas e prinzis decidan a reguard la cretta da lur sudits, oter co in cuntradas dominadas da citads pussantas, tschüffan pro nus las cumünanzas dals cumüns e dafatta ils individs üna vusch importanta in quellas dumondas.
Ingio chi’d ais il Spiert dal Segner, là ais libertà. (2 Cor 3,17)
Trais ons davo cha Joannes Comander es gnü nomnà predichant a Cuoira, pac temp davo cha las prümas raspadas han cumanzà a celebrar la Soncha tschaina refuormada, tschüffan homens e duonnas la libertà da’s decider per la cretta catolica o refuormada. Our da nos punct da vista po quai esser üna libertà magara limitada, per exaimpel baptists nu giodaivan quista nouva libertà, ma i’l context dal 16avel tschientiner es quai ün’invenziun insolita chi tschercha seis congual.
Ingio chi’d ais il Spiert dal Segner, là ais libertà. (2 Cor 3,17)
Cha la libertà cristiana guida, sco dal 1526 als Grischuns catolics e refuormats curaschus, hoz eir a nus da sustegner a quels chi vegnan perseguitats pervi da lur cretta, cha la libertà cristiana ans guida i’l respet per noss conumans e lur ideas forsa differentas, cha la libertà cristiana maina adaquella cha nus nu gnin stanguels illa tschercha sincera da quel chi’ns regala nossa libertà! Eu tils giavüsch üna buna dumengia!