Saveis Vus aunc seregurdar da Vies emprem di da scola? Tgei sentiment era quei? In sentiment da legria ni eras Vus schizun era empau nervus? – Jeu creiel che Vossas rispostas vegnan ad esser aschi differentas sco quellas dils affons ch'entscheivan proxima jamna la scola. Jeu sai s'imaginar ch'ei dat biars affons che selegran da turnar puspei en scola, mo ei dat era da quels che fan vess che las vacanzas van a fin. Auters affons ein spanegiai sin la nova scolasta ed aunc auters ein empau nervus sedumandond sch'els anflan camerats da scola ella nova classa.
Era sche miu emprem di da scola schai varga 30 onns el vargau, sai jeu aunc seregurdar bein da quei sentiment che jeu hai giu da lezzas uras. Jeu sun selegraus ed hai era giu grond plascher dad ir a scola, mo tuttina erel jeu empau nervus e malsegirs, cunquei che jeu enconuschevel aunc buca tut mes conscolars. – Tut quellas regurdientschas ein vegnidas endamen a mi avon pauc temps, probabel era perquei che jeu hai quest gliendisdis miu secund «emprem di da scola». Quella gada buca sco scolar, mobein sco scolast.
Quellas midadas dil davos temps han schau encorscher mei ch'ei drova ina buna purziun curascha e fidonza per quella nova fasa da veta.
Questa stad ei stada per mei empau ina stad dallas midadas: Jeu hai finiu miu studi, hai bardigliau, habiteschel en ina nova vischnaunca e stun ussa lu sco scolast per l'emprema ga avon mia atgna classa. – Tut quellas midadas dil davos temps han schau encorscher mei ch'ei drova ina buna purziun curascha e fidonza per quella nova fasa da veta. Bia ei ussa aunc malguess. Tgi dat a mi la garanzia che jeu sun ussa silla dretga via?! Tgi di a mi che jeu hagi priu la dretga decisiun?
Era sch'ei dat en quei mument aunc damondas e malsegirtads, sentel jeu era las marveglias ed il grond plascher per il niev che spetga mei. E quei ha per mei da far cun fidonza; ina fidonza che jeu sun buca persuls sin mia via. Per l'ina eis ei la partenaria, la famiglia ed ils collegas che sustegnan ed accumpognan mei cun plaid e cussegl. E da l'autra vart la fidonza che Diu accumpogna mia via cun sia benedicziun. Ina fidonza che ha siu origin el Veder Testament. Tier Noah ed Abraham ed aunc tier bia autras raquents biblics eis ei in messadi central che Diu benedescha nossa veta e nossas vias. El ei cun nus sche nus ughegein da star si e da semetter sin via, ed era sche nus mein in'autra via che tochen dacheu.
Perquei sun jeu era fetg optimistics pertuccont las sfidas che spetgan mei el niev onn da scola. Enzaco vegn ei a funcziunar ed jeu hai biars che sustegnan mei... – E quei giavischel jeu era a Vus: che Vus hagies fidonza e sentis il sustegn da biars en mintga nova entschatta.