Siglir tar il cuntegn

Header

audio
Pled sin via da Flurina Cavegn-Tomaschett
Or da Vita e cretta dals 30.10.2022.
laschar ir. Durada: 2 minutas 58 Secundas.
cuntegn

Pled sin via Ina scala denter tschiel e tiara

Ei dat siemis che van profund. Quei vala schibein pils buns sco era pils schliats siemis. Enqualga van els schi profund ch’els midan schizun la veta. Sco p.ex. tier Jacob. Dad el e siu siemi savein nus leger en la bibla (Gen 28, 10-22). Igl ei, tenor miu manegiar, in raquent che tschaffa ed in che stat exemplaricamein era per nies temps.

Jacob era sin la fugia perquei ch’el veva cuglienau siu bab e siu frar. La sera eis el semess a durmir sut tschiel aviert. Sco plumatsch ha in crap stuiu survir, forsa simbolicamein pil buordi dalla cuolpa ch’el purtava egl intern. La notg ha Jacob giu in intensiv siemi. El ha viu ina scala ch’era francada sin tiara e tunscheva viaden en tschiel. Sin quella scala mavan aunghels si e giu. Sisum la scala era Dieus e lez ha detg: «Jacob, jeu sun tiu Diu. La tiara nua che ti schais vi jeu regalar a ti ed a tia descendenza. Jeu vegn ad esser cun tei e buca bandunar tei.»

Realisar siemis drova savens curascha, perquei ch’els paran sin l’emprema egliada nunrealisabels.
Autur: Flurina Cavegn-Tomaschett Teologa

Il siemi ha midau la veta da Jacob. Malgrad sia cugliuneria ha Dieus dau ad el l’empermischun dad esser cun el. La scala el siemi ha fatg punt denter tschiel e tiara e colligiau Jacob cun Diu. El stgir da sia veta ed el silenzi dalla notg ha la vusch da Diu pudiu contonscher Jacob e midar sia veta. Quei ha Jacob fatg veseivel cun tschentar sidretg il crap che veva surviu sco plumatsch. Lez stat da quei mument enneu sco tierm da midada en sia veta. Quei liug terrester ei daventaus per el in liug divin che Jacob ha numnau «casa da Diu».

Siemis e visiuns san era midar nossa veta. Sco quei ch’il tschiel el siemi da Jacob ei seviarts ed ha mussau ina scala da colligiaziun denter tschiel e tiara, aschia san siemis e visiuns era arver a nus novs horizonts e perspectivas ed iniziar midadas per nies futur.

Dom Helder Camara, igl enconuschent uestg brasilian, ha inaga detg: «Sche in siemia persuls ei quei sulet in siemi. Sche biars siemian communablamein ei quei l’entschatta d’ina nova realitad.» Realisar siemis drova savens curascha, perquei ch’els paran sin l’emprema egliada nunrealisabels. Da cuminonza va denton tut meglier e cugl agid da Diu aunc bia meglier.

RTR 08:45 Pled sin via

Artitgels legids il pli savens

Scrollar a sanestra Scrollar a dretga