(sursilvan) A mi paran las numerusas tradiziuns d’advent d’esser empau ina sfida. Tgei usits han dau colur a mi’affonza? Tgeinins corrispundan aunc oz a mi? Tgeinins less jeu dar vinavon? – Avon zacons onns vein nus en famiglia mess ensemen in carnet cun canzuns d’advent e Nadal. Quel lubescha mintg’onn da cantar ensemen nossas canzuns preferidas, nos hits.
Dalla bial’entschatta ha ina canzun fascinau e tschaffau mei. Quella vein nus giu anflau tier Peter Reber. Igl ei ina canzun svedesa che sebasa sil text da Rolf Zuckowski. La canzun tschenta gest all’entschatta la damonda: Tgei fuss ei sch’el vegness veramein, vul gir sche Cristus vegness veramein?
Sch’el vegness e fuss a Cazas en perschun ni el Beverin. Ni sch’el fuss giu Cuera el Stadtpark ni en in dils centers da transit per asil. Tgi tunschess lu il maun ad el, ni ad ella?
Vid igl advent vegn ei visibel, con centrala che quella damonda ei. Il plaid «advent» munta gie «vegnida», la vegnida dil Segner. Quei vul gir ch’il temps d’advent ei buca mo preparaziun silla fiasta da Nadal, mobein era preparaziun silla vegnida dil Segner.
Enconuschentamein ei la speronza sin quella vegnida pil pli buc fetg presenta, mo tuttina, ella ei cheu. Forsa fussen nus pulitamein surpri e schizun surdumandai, sch’il Segner turnass en nies temps e vegness tier nus gest quels gis.
Nossa damonda fuss puspei actuala: Tgei fuss ei, sch’el vegness veramein? La canzun sedamonda vinavon, tgei ch’ei fuss sch’il Segner fuss buca sco nus s’imaginein el, sch’el vess in’autra pial, auters cavels. Gie, tgei fuss ei lu? Co secuntenessen nus?
Tier sia emprema vegnida a Betlehem para Jesus buca da ver giu grond’accoglientscha. Egl evangeli tenor Lucas ha ei num ch’ei vevi buca plaz per Giusep e Maria ella casa d’albiert (mira Lc 2,7). Els hagien stuiu untgir en in nuegl per parturir igl affon.
Stuess el quella gada era untgir enzanua denter animals e strom? Sch’el vegness veramein e fuss auters che nus. Sch’el vegness e fuss a Cazas en perschun ni el Beverin. Ni sch’el fuss giu Cuera el Stadtpark ni en in dils centers da transit per asil. Tgi tunschess lu il maun ad el, ni ad ella? – Tgisà, forsa entupein nus traso tals advents, denton senza s’encorscher.