Siglir tar il cuntegn

Header

audio
Pled sin via
Or da Vita e cretta dals 18.08.2022. Maletg: MAD
laschar ir. Durada: 3 minutas 10 Secundas.
cuntegn

Pled sin via «Jede bruucht sy Insel»

«Jede bruucht sy Insel» chantaiva il Bernais Peter Reber fingià avant passa trent’ons. El quinta dad ün lö ingio cha nus das-chain simplamaing esser e laschar pender noss’orma. La chanzun es dvantada ün’auricula e bod minchün ha almain fingià dudi la melodia.

Dürant las ultimas eivnas ha blera glieud cultivà in ün tschert sen si’isla, chi saja a la riva dal mar, sül prümaran o dürant üna gita o üna tura cul velo. Uossa sun qua fotografias e regordanzas chi’ns restan ed accumpognan. I sun quists mumaint paradisics chi’ns dan forza in nos minchadi da lavur e chi svaglian suvent üna tscherta increschantüm.

«Jede bruucht sy Insel» disch eir, cha quists temps sun passagers e cha ningün nu po tils conservar per adüna. Cha’l temp süll’isla viva da quist fat e chi tocca pro, da tilla stuvair bandunar e dad ir inavant – suvent cull’increschantüm.

Eir il rom biblic viva dals lös d’increschantüm: Al tuot cumanzamaint sta la creaziun dal paradis e sia perdita. L’uman nu para dad esser fat per viver adüna i’l paradis. Pels umans dvainta’l ün lö d’increschantüm, intant ch’els as sgoban pro lur greiva lavur corporala. Lönch tils varan accumpagnadas la regordanzas dad increschantüm dal paradis chi svanischa vieplü a l’orizont. Plü tard crescha da tschella vart da l’orizont ün’otra increschantüm: L’impromischiun dad ün pajais ingio chi culan meil e lat. Quist lö impromiss dvainta il böt bramà e la motivaziun per ün pövel inter da’s metter darcheu in movimaint.

I sun quists mumaints paradisics chi’ns dan forza in nos minchadi da lavur e chi svaglian suvent üna tscherta increschantüm.
Autur: Stephan Bösiger Raverenda

«Jede bruucht sy Insel» quinta dad ün lö ingio cha’l temp perda si’importanza, cha’l muond es in uorden e chi’s driva ün toc paradis. Il text biblic ans tira adimmaint, cha nus nun eschan buns da conservar il paradis ed ans affida da tschella vart l’impromischiun cha nossa via ans maina vers ün nouv paradis.

Scha’l temp da vacanzas es uossa a fin, lura ans chattaina darcheu i’l minchadi da lavur. I füss però fatal, scha nus mettessan be d’vart nossas regordanzas da noss’isla chi’d es nos lö da forza. Blerant po la fiduzcha allegraiva, da pudair tuornar, ans motivar da tour per mans nos minchadi e da salvar ün toc paradis in nossa vita quotidiana. Dad ir nossa via, chi’ns maina minchatant tras il desert, ma culla perspectiva d’ün pajais ingio chi culan meil e lat.

RTR 08:45 Pled sin via

Artitgels legids il pli savens