(Sursilvan) Tgi da Vus sa, tgei ch’ina funda ei? Jeu dun in tip: Cun quei utensil ha il giuven David terrau il gigant Goliat. Clar, ei setracta leu dalla «Steinschleuder», quei ei bein enconuschent. D’ina funda, sco ei stat el vocabulari, vevel jeu tochen uss denton aunc mai udiu. Ella cumissiun ecumena che translatescha la bibla en romontsch sursilvan vein nus dacuort translatau l’historia da David e Goliat. Ed en quei connex vein nus discutau: co lein ussa translatar «Steinschleuder», sche buc olma dano ils profis da romontsch san, tgei ch’ina funda ei?
Mo atgnamein ei quei mo in pign problem, sche jeu patratgel, con grev ch’igl ei dad insumma capir ils texts biblics. Nies lungatg semida aschi spert ed ei dat adina puspei novas creaziuns da plaids. Ozilgi san ins per romontsch enstagl da ruassar e serecrear era «chillar».
Per capir il lungatg dalla bibla drova ei perquei buca mo translaziuns ord il hebraic e grec, mobein era empau enconuschientscha dalla cultura e veta sociala da gliez temps.
Tier la bibla vesa ei ora auter. Dapi ch’ils texts ein vegni mess a scret, ein els vegni tradi d’ina generaziun a l’autra senza pli grondas midadas. Ei dat zuar translaziuns pli libras, magari era dètg creativas, sco la Volxbibel, nua che laics han adattau ils raquens a nies temps. Mo finamira da mintga translaziun seriusa ei da mantener il text original. Per capir il lungatg dalla bibla drova ei perquei buca mo translaziuns ord il hebraic e grec, mobein era empau enconuschientscha dalla cultura e veta sociala da gliez temps.
Malcapientschas dat ei denton era sche nus plidein il medem lungatg. Daco reagescha el uss aschia? Daco capescha quel buca mei? Cheu gidan era vocabularis nuot. Atgnamein drova ei adina empau lavur da translaziun, sche nus discurrin e communichein in cun l’auter. Ins astga buca capir tut verbalmein. Mintgaton ston ins leger denter las lingias ni dumandar suenter. Ei cunvegn era da risguardar il context, enstagl da leger mo ina construcziun.
Ed adina puspei realiseschel jeu, che nus savein halt buca capir tut. Lu eis ei meglier da quescher, chillar empau, e mirar anavon. El psalm 139 savein nus per exempel leger che Diu capescha nus totalmein. Quei sto tonscher en tals muments.
La nova translaziun sursilvana duei en mintga cass buca caschunar memia bia confusiuns. Ei fuss bi sche quellas e quels che legian la bibla en lur lungatg mumma anflassen leu novs impuls. Tier il raquent da David e Goliat vein nus perquei circumscret il plaid «funda» cun «curegia per fierer crappa». Sche Vus veis ina megliera proposta, lu saveis bugen s’annunziar!