(sursilvan) Quella canzun audel jeu pil mument adina puspei enzanua en nossa casa da scola. Dapi duas, treis jamnas ein mes scolars dalla 1. e 2. classa vida exercitar las canzuns per il til da latiarnas che ha liug proxim gliendisdis a Flond. E plaunsiu sentins era co ils affons selegran d’astgar presentar las latiarnas ch’els han zambergiau e surtut da veser co quellas glischan el stgir dalla notg.
Clar e stgir, di e notg, umbriva e glisch – quei ei per mei ina ferma simbolica che va bein a prau culla stagiun actuala nua che las seras ein liungas e stgiras. Mo ulteriuramein eis ei per mei era ina simbolica che descriva bein las bunas e nauschas experientschas che nus fagein en nossa veta cullas varts umbrivaunas e suleglivas.
Tgi che fa ad auters dil bien, quel regala ad els muments da glischur.
Per survegnir in‘ idea tgei che quellas varts umbrivaunas en nossa veta ein, tonscha ei ozildi da dar in sguard ellas gasettas: novitads d’uiaras, rapports da terrur ed autras sgarschurs, tut quei muossa bein avunda con stgir ch’ei sa esser sin nies mund. Mo era culps sco malsogna, ina greva sperdita ni auters destins persunals san stgirentar nies mintgadi, e quei d’in mument sin l’auter.
Per cletg ei quei mo ina vart dalla medaglia! Contas gadas vein nus fatg en nossa veta l’experientscha che la glisch ei tuttina pli ferma che las stgiradetgna? Contas gadas ha ei dau radis da speronza, era sche tut entuorn era stgir? Contas gadas ha in carstgaun fatg ina bun’ovra, ina pintga gesta, dau in bien plaid ni era semplamein cun sia preschientscha empau glisch en temps stgirs da nossa veta?
Tgi che fa ad auters dil bien, quel regala ad els muments da glischur. – Quei patratg ei vegnius endamen a mi, cura che jeu hai udiu mes scolars a cantar: «Jeu mon cun mia latiarna e mia latiarna cun mei». Aschia sco els portan glisch cun lur latiarnas el stgir dil vitg, aschia duein nus schenghegiar in a l’auter muments ch’ein sco radis da sulegl che sclareschan e scauldan.
Aschia giavischel jeu a Vus tuts, ch’ei detti era tier Vus adina puspei da quels muments plein glisch e clarezia!