Ina damaun baul cun la levada dil sulegl semettel jeu sin via per viandar el desiert e sesfundrar el silenzi, ella tgeuadad e ruasseivladad, forsa era per fugir dad entgins patratgs che occupavan mei fermamein il davos temps. Ed jeu sedamondel: Pertgei fetgel jeu quei? Pertgei enquerel jeu el mitus digl Orient, sin la peninsla arabica el desiert da «Rub Al-Kahli» in vast territori en la cuntrada dils Emirats, il silenzi en retratgadad, schegie che quei territori ch’entscheiva suenter la gronda capitala dils Emirats, pia dad Abu Dhabi, ei plitost enconuschents als biars da nus per siu extrem luxus, baghetgs imposants, ina veta emperneivla che porscha a nus tut quei ch’ins sa e vul cumprar.
Sentir, patertgar ed esser presents ussa gest en quei mument, quei level experimentar.
Adina puspei hai jeu legiu ed udiu da pliras varts ch’il problem da nus carstgauns el vest seigi, che nus vivien bia memia pauc el present mobein plitost egl avegnir ni el vargau. Propi il cuntrari: sentir, patertgar ed esser presents ussa gest en quei mument, quei level experimentar cun quella excursiun. Ina vertid che vegneva era praticada el temps da Jesus.
En harmonia eis ei pli sempel da seconcentrar ed anflar l’attentivitad, ferton ch’igl ei per mei en la solitariadad gest il cuntrari e la sutga per meditar ei insumma buca miu cass. Cun il ritmus dils pass viagonts reussesch’ei forsa a mi da seprofundar el silenzi. La cuntrada dil desiert circumdada da quietezza ei en quei mument in agid.
Ils radis dil sulegl scauldan e brischan senza schanetg. E sche tscheu e leu magri in ni l’auter patratg sgola tier mes cars da casa ni la lavur, ni tier las extremas impressiuns dils davos dis, emprovel da metter el dalla vart, trer profundamein flad e restar el flow. Igl ei impurtond da temps en temps da seschar en sin tals experiments, pertgei havend distanza dallas occurrenzas dil mintgadi e seretrer en certs muments en tgeuadad e reflectar, quei dat curascha dad ir vinavon sin la via dalla veta che porscha bein enqual surpresa ed era empau craps en via, ils quals ei tucca da surmuntar.
Mo in patratg quietescha mei zun fetg. Pertgei sche nus mirein anavos sil temps da Jesus, savein nus leger ella bibla secund Lucas che di a nus: Mintga gada cura che jeu hai tarmess vus a viagiar senza buorsa, senza fagot e senza calzers, ha ei muncau a vus enzatgei? Ed els han rispundiu: Na, mai hai enzatgei muncau a nus.