Siglir tar il cuntegn

Header

audio
Pled sin via dad Anja Felix
Or da Vita e cretta dals 26.12.2021.
laschar ir. Durada: 3 minutas 5 Secundas.
cuntegn

Pled sin via La cesura el temps

«Mo cu il temps ei staus cumplenius, ha Dieus tarmess siu Fegl, naschius d’ina dunna.» Empau sco en ina praula tuna ei ella bibla, sch’ei vegn raquintau dalla naschientscha da Jesus. Cu in temps fix ei cheu, daventa ei Nadal. Tut capeta da siu temps, dil temps d’affonza, dil temps d’uiara, dil temps d’unviern. Aschia varga il temps. Cun natalezis, giubileums e fiastas empruein nus da dar structura al temps e far pintgas cesuras. Mo il temps cuora vinavon, sco tochen dacheu, e selai buca disturbar dad eveniments.

Mo Dieus, igl etern, lez vul era far part da nies temps. Ed aschia raquenta la historia da Nadal che Dieus daventa carstgaun e vegn en nies temps.

Jesus ei gie buca naschius en in mund pascheivel ed optimal. Mo el ha fatg curascha e mussau novas vias in cun l’auter.
Autur: Anja Felix-Candrian Plevonessa da Trin

Igl evangeli da Lucas raquenta digl imperatur Augustus e dalla dumbraziun dil pievel, dalla historia politica da siu temps. E dasperas raquenta el era historias persunalas da Maria ed Elisabet che s’entaupan avon la naschientscha. L’historia da Nadal pertucca pia l’historia privata sco era l’historia dil mund.

Ei savess era tunar aschia: Cu il temps ei staus cumplenius, ha la giuvna pachetau sia valischa ed ei ida naven da siu dacasa. Da gliez temps ein tschien auters semess en ina barca ed ein navigai sur mar per encurir ina nova perspectiva. E da gliez temps eran ils cunfins serrai, pervia d’in virus che circulava denter ils carstgauns.

Era tier nus semischeida l’historia mundiala cun nossa historia persunala. E cumplenius ei era nies temps, emplenius cun tema e depressiuns, cun schliatas novitads e malreussida. Mo dapi lezza notg era cun speronza, cun segns da cordialitad e culla canzun «Clara notg da Nadal». Jesus ei gie buca naschius en in mund pascheivel ed optimal. Mo el ha fatg curascha e mussau novas vias in cun l’auter.

Aschia ha ei dau ina cesura radicala el temps. E dapi lu dat ei per nus mintg’onn aschi’ ina pausa beinvegnida. Nus savein prender temps per nus sezs ni era regalar nies temps. In’actura tudestga ha inaga getg: «Jeu sai buca s’imaginar ina veta senza Nadal. La veta ei gie schi malsegira. Nadal gida da tener ora quellas malsegirtads. Sin zatgei ston ins bein saver seschar!»

Nadal vegn onn per onn – in spazi per custeivels muments, sentupadas e discuors e pigns segns ch’enriheschan nos gis. Sur Nadal ora.

RTR 08:45 Pled sin via

Artitgels legids il pli savens

Scrollar a sanestra Scrollar a dretga