Vairamaing es l’uman üna creatüra geniala. El sa s-chaffir robas incrediblas ed il svilup tecnic es immens. Uschè pudain nus simplamaing schmachar sün ün pom e subit vegna cler. O nus pudain stordscher üna clav e nos auto as metta in movimaint. Nus drivin üna spina e subit cula aua. Nus svolain in ün aviun in pacas uras dad ün continent a l’oter ed in üna raketa dafatta sülla glüna. La medicina moderna es uschè sviluppada cha bleras malatias chi d’eiran üna jada mortalas sun hoz curablas. Nos handys sun computers cumplichats cha nus pudain dovrar bod dapertuot ed adüna.
Armas nu sun mai üna soluziun, violenza nun es mai üna soluziun – ella maina be adüna darcheu a nouva violenza.
Sco dit, vairamaing es l’uman üna creatüra geniala. Ma cur chi’s tratta dad ir intuorn cun conflicts es el eir hoz amo üna creatüra fich primitiva. Sco cha nus savain tuots esa darcheu guerra in Europa. Darcheu vegnan mazzats mincha mumaint numerus umans tras brutalas armas modernas (e be per dir: eir quistas armas sun ün prodot da la creatività umana!). Ingio es in quist connex la creatività umana chi füss capabla da chattar nouvas vias per soluziuns constructivas?
Ma quai chi capita es alch oter: dapertuot cloman ils politikers da dretta fin schnestra il listess. «Nus stuvain respuonder a la violenza cun violenza. L’unica soluziun per ün tal conflict sun las armas.» Ma armas nu sun mai üna soluziun, violenza nun es mai üna soluziun – ella maina be adüna darcheu a nouva violenza.
Nu füssa ur’e temp da’s regordar da nossa creatività constructiva basada sün nos spiert? Il spiert uman es plain creatività, üna creatività immensa e chafuolla e sainza cunfins. Nos spiert ans dà la pussibiltà da chattar nouvas vias in nouvas situaziuns da guerra e conflicts. Scha nus vulain esser umans esa ün’obligaziun absoluta da dovrar quist spiert. Id es quist spiert chi sa precis: illa realtà nu daja differents pajais, i nu dà differentas culturas, razzas e religiuns – vairamaing daja be üna famiglia umana.