(sursilvan) Ferton che mes patratgs circumdeschan las preparativas da Nadal cun tut siu brimborium, clara notg, bambin, pasturs, pursepen, aunghels, adoremus, transeamus, gloria inexcelsis, schengetgs, pigneuls, buns giavischs e bunas tschaveras vegn la historia dil pader Leopold dil Kasakstan endamen a mi. El haveva raquintau quella a mi aschia:
Duront la viseta dil cardinal Tarcisio Bertone a Karaganda dil temps nua che la maiestusa e biala catedrala era aunc buca consecrada, fuva la baselgia da sogn Giusep el quartier da Maikuduk la baselgia episcopala. En quei quartier vivevan dil temps da Stalin mellis e mellis Tudestgs-Russ che eran vegni deportai a Kasakstan duront l’era sovietica. Da quella pleiv ein numerusas clamadas sacerdotalas naschidas, sco il renomau Ladislaw Bukowinski, che vegn numnaus gl’apostel dil Kasakstan. Mo quella baselgia da sogn Giusep era en realitad in baselgia fetg mudesta, stgira ch’ins strusch anflava, viagiond atras las vias dil quartier. Per entrar stuev’ins descender in pèr scalems sutterans, cunquei ch’il clutger dalla baselgia astgava buca vargar si il tetg dalla scola ella vischinonza.
Il cardinal Bertone che era da gliez temps aunc secretari dil stadi dil Vatican era vegnius gest il temps da Nadal sin viseta. Ina caussa fetg impurtonta che haveva caschunau preparativas da segirtad intensivas. La sera avon sia arrivada han ins aunc tut alla bahutta stuiu stender fils d’electricitad per illuminar la paupra via ch’era senza asfalt e cazzolas.
Gie schizun la guardia dil president era responsabla per la segirtad dil cardinal. Strusch haveva la messa da Nadalnotg en quella baselgia fullanada entschiet, ei la forza electrica vegnida interrutta. Aschia ch’els eran tuttenina tut el stgir. Mo las candeilas sigl altar ardevan aunc e dall’orgla resunavan ils davos tuns. Immediat era ei vegniu tut stgir e quiet ella baselgia da Karaganda. La guardia da segirtad ha bess a tiara il cardinal per proteger el, cartend ch’ei setracti cheu d’in attentat terroristic. Gl’entir pievel steva sco sin spinas, era malruasseivels e plein anguoscha.
Daferton che la guardia da segirtad ha entschiet a telefonar per procurar la forza electrica ei il cardinal Bertone ius enviers gl’ altar ed ha entschiet in priedi spontan e commuentond: Nus festivein Nadalnotg e palpein el stgir, nus havein tema, la medema tema che la Sontga Famiglia ha sentiu sin siu viadi a Bethlehem avon la naschientscha da siu fegl. Nus savein oz ir cun Maria e Giusep sin viadi, in viadi enviers la naschientscha dil Salvader Jesus Cristus per contonscher la glisch e selegrar da sia naschientscha.
Lein sperar che la glisch da Nadal sclareschi tuts, oravontut ils pertuccai en Palestina, a Bethlehem, ella strema da Gaza, en Cisgiordania ed a Gerusalem. Quella glisch levgeschi lur sort.