Siglir tar il cuntegn

Header

audio
Pled sin via dad Anja Felix
Or da Vita e cretta dals 31.12.2023. Maletg: Anja Felix-Candrian
laschar ir. Durada: 3 minutas.
cuntegn

Pled sin via La largia denter vegl e niev

(sursilvan) «Please mind the gap!» Era sche Vus essas aunc mai stai a Londra, vegn quei avis ella metro forsa avon enconuschents a Vus. «Mind the gap – fagei adatg dalla largia!» Igl ei da far in pulit pass dil perrun tochen tier la sava digl esch dil tren.

Nus sesanflein uss alla sava d’in onn niev. In pèr dis denteren, ina pintga largia denter vegl e niev. Nus fagein in sguard anavos e savein smarvigliar, tgei ch’ei tut stau e capitau igl onn vargau. E lu mirar anavon, cun differents sentiments.

Nus sesanflein uss alla sava d’in onn niev. In pèr dis denteren, ina pintga largia denter vegl e niev.
Autur: Anja Felix-Candrian Plevonessa

La bibla raquenta da Jacob che steva inaga avon ina impurtonta traversada, leu avon il vau dil Jabboc. Biars onns era Jacob staus naven da casa, ussa ha el vuliu turnar ed ha perquei stuiu traversar il flum Jabboc. Atgnamein buc ina gronda caussa, per Jacob denton in grond pass. El era il frar giuven dad Esau e veva cuglienau siu bab ed engulau la benedicziun previda per Esau. Lez era sevilentaus talmein che Jacob ha stuiu scappar e baghegiar si ina nova veta. Mo ussa, cheu sper il Jabboc, cu Jacob vegn pli datier da sia patria, vegn el pertscharts ch’el sa buca fugir dil vargau. Suenter biars onns vegn el puspei ad entupar siu frar ed ha tema tgei che spetga el.

Sia famiglia ei gia dall’autra vart dil flum, e Jacob stat anavos persuls. Tuttenina cumpara enzatgi che fa lutga cun el. In cumbat che cuoza l’entira notg. Mo Jacob sedefenda cun tutta forza. El lai buca liber l’auter. Quei che Jacob vul, ei denton buca la victoria, mobein la benedicziun. E l’auter benedescha Jacob e di: «Ti has fatg lutga cun Diu e cun carstgauns ed has dumignau.»

Quei raquent misterius dat era buns avis per Silvester. Atgnamein vein era nus da far mo in pign pass per arrivar egl onn niev. Quei va tut da sez. Tuttina eis ei ina caschun da ponderar, tgei pass che nus lein far egl avegnir. E nus savein seregurdar, tgei che nus vein gia tut dumignau el vargau. Era egl onn niev vegn ei a dar muments nua che nus sgiavlein e plirein, nua che nus stuein batter e morder atras. Mo sco Jacob astgein nus silsuenter spitgar benedicziun. Quei quenta en tals muments dapli che dad haver victoria ni pussonza. Jacob ei vegnius benedius ed ei silsuenter ius vinavon tut liberaus. Quei ei bein ina buna perspectiva per igl onn niev. Vegni bein suravi!

RTR Pled sin via 08:45

Artitgels legids il pli savens