Siglir tar il cuntegn

Header

audio
Pled sin via da Silvia Gartmann dals 18-12-22
Or da Vita e cretta dals 18.12.2022. Maletg: MAD
laschar ir. Durada: 2 minutas 47 Secundas.
cuntegn

Pled sin via La victoria dalla glisch

Il stgir dalla notg vegn sclarius dalla glisch da melli candeilas. Il ruaus dalla notg vegn embellius da nundumbreivlas vuschs sonoras. Il freid dalla notg vegn spuentaus da carstgauns ch’ein seradunai per festivar ensemen. Lein dar in‘egliada, co differentas religiuns festiveschan la victoria dalla glisch sur la stgiradetgna.

Mo, co vesa quei ora en nossa atgna veta? Sclarescha la glisch era vossa veta? Saveis era vus viver vossa religiusadad libramein? Dat ei era en vossa veta schliatadads ch‘ei vala da surmuntar?
Autur: Silvia Gartmann Scienziada da religiun

La damaun baul – in di dall’jamna egl advent entuorn las sis – serendan cristians e cristianas en baselgia per festivar «rorate». La baselgia ei illuminada mo cun candeilas. Ellas simboliseschan la glisch che Jesus vegn a purtar als cartents.

Da Chanukka serendan gedius e gediuas en lur sinagoga ni sin in plaz cun in candelaber da chanukka. Ei seregordan dil temps, cu ei han danovamein saviu consacrar lur tempel a Jerusalem a Dieus, suenter ch’ils Grecs vevan adorau Zeus en tal. Ei seregordan dil temps ch’ei astgavan puspei viver lur religiun libramein.

Duront Diwali decoreschan ils Hindus lur casas cun amplas dad ieli ni cadeinas da glisch. Quellas simboliseschan ch'il dieu Rama ha surventschiu il demuni Ravana, ch‘il dieu Krishna ha deliberau plirs mellis dunnas captivadas e che la dieua Kali ha surmuntau la mort.

Tut ils cartents e las cartentas festiveschan che la glisch sclarescha adina puspei la stgiradetgna dalla notg, e ch’il stgir untgescha alla levada dil sulegl. Mo, co vesa quei ora en nossa atgna veta? Sclarescha la glisch era vossa veta? Saveis era vus viver vossa religiusadad libramein? Dat ei era en vossa veta schliatadads ch‘ei vala da surmuntar?

RTR 08:45 Pled sin via

Artitgels legids il pli savens

Scrollar a sanestra Scrollar a dretga