(vallader)
Lura sortirà dal trunc d’Isai üna manzina,
ün giarzöl da sias ragischs portarà früt.
Sün el posarà il spiert dal Segner,
il spiert da sabgentscha e d’intelligenza,
il spiert da cussagl e da fermezza,
il spiert da cugnuschentsch’ e da temma da Dieu.
(Es 11,1–2)
Ün text dal profet Esaja chi vain daspö generaziuns da cristianas e cristians interpretà sco annunzcha da la naschentscha da Gesu Crist. Da quai dà perdüttanza il cuntschaint coral «’Na rösa splendurainta es Crist, nos Segner char», tradüt da Martin Martin dal 1684 e daspö quai üna part importanta dal chant in baselgia, in terra ladina dürant l’on inter.
Cha tuot ils uffants imprendan hoz a leger ed a scriver, quai es eir la ierta da l’importanza da la Soncha Scrittüra per nossa cretta.
Cun Cristus aintra ün nouv spiert illa cretta, apunta «il spiert da sabgentscha e d’intelligenza, il spiert da cussagl e da fermezza, il spiert da cugnuschentsch’e da temma da Dieu» (Es 11,2). Uschè nu faja star stut cha la cretta cristiana es da sia prüm’ura nan eir ferm interessada vi da l’instrucziun e la scolaziun. Cha tuot ils uffants imprendan hoz a leger ed a scriver, quai es eir la ierta da l’importanza da la Soncha Scrittüra per nossa cretta. Instrucziun e scolaziun s-chaffischan üna nouva güstia na be, ma eir in dumondas da fai.
Sco cha Dieu nun es ün visavi, cul qual chi’s fa cugnuschentscha in ün di, sumaglia tuot la vita ad ün unic proget d’imprender. L’arsantüm, la brama da vulair savair, da vulair incleger es nada e cumpiglia il muond visibel sco invisibel, creaziun e Creader medemmamaing. Quai renda la cretta uschè fascinanta, quai fa cha nossa fai as sviluppa dürant e cun la vita, quai fa cha la vita tschüffa üna dimensiun poetica, ch’ella dumonda davo seis sen, ch’ella guarda sur ils agens cunfins e l’agen orizont oura.
Dieu es meis visavi chi fa ch’eu nu n’ha mai fini d’imprender. El resta massa grond ch’eu til pudess incleger dal tuot; Dieu transcenda tuot il pudair savair da nus essers umans, ed uschè eir meis. Gesu Crist, dal qual cha nus algordain la naschentscha in ün’eivna, ans fa incleger cha Dieu ans fa far cugnuschentscha cun sai svess tuot oter co culs solits möds d’imprender, nempe illa profuondità da la vita ed i’l inscunter cul prossem. Là ans fa’l incleger cha vaira fermezza consista in deblezza, cha la dumonda da dret e fos vain superada da la generusità da la charità, là ans fa’l cugnuoscher amur cunter tuotta temma, la vita cunter la mort. Uschè naschirà nossa cugnuschentscha da Dieu cun Gesu Crist, eir hoz ad ot, a Nadal.