(sursilvan) In tec rir hai jeu schon stuiu, cu jeu hai udiu ina damaun al radio, ch’ils meins november seigi il meins da raclette. Po esser, ch’ina ni l’auter ha puspei gust sin quella tratga, cu ei vegn pli freid. Mo per mei ei il november il meins che lai regurdar nus vid quellas e quels ch’ein morts. En mintga cass fagein nus quei sco cuminonza cristiana.
Savess ins forsa era pretender ch’il november seigi il meins dallas larmas ? Larmas che empleinan ils egls da quellas e quels che han stuiu prender cumiau d’in carstgaun carezau. Larmas d’encarschadetgna, dil cordoli, dalla tema arisguard il futur.
Larmas ein in dils megliers mussaments, che tgierp ed olma ein colligiai. In profund sentiment muossa ina reacziun corporala.
Cu veis vus bargiu la davosa ga ? Forsa, sco jeu, duront mirar in film ? Ni pervia da mal corporal, entras ina malsogna ni accident? Ni eisi stau larmas da gretta e desparaziun, da trumpada ? Forsa ch’igl ei era stau larmas da legria?
Larmas ein in dils megliers mussaments, che tgierp ed olma ein colligiai. In profund sentiment muossa ina reacziun corporala. Atgnamein fascinont! Ins savess dir che las larmas seigien il ventil dall’olma, il lungatg dils sentiments, ni il liquid che lava las plagas.
Larmas ein buca mo expressiun da sentiments; ellas provocheschan era sentiments. Buca per nuot dian ins che larmas rumpien rempars ni laschien sballunar mirs.
En in museum historic dil temps dall’ antica hai jeu avon onns viu enzatgei remarcabel: in ruoghet da larmas. En tals ruoghets dueva il defunct ni la defuncta rimnar las larmas da quels ch’eran trests pervia da sia mort. Quella cardientscha paganila mava da quei anora, che las larmas fetschien vegnir bletschs il lanziel dil miert e che gliez seigi malemperneivel. Perquei surveva il ruoghet per rimnar ellas.
Il maletg dil ruoghet da larmas ei era d’anflar en la Bibla. En in psalm ha ein num: «Ti Segner rimnas mias larmas en in ruog, senza dubi, ti dumbras ellas» (Ps 56,9). Quei vers di a mi che las larmas che jeu spondel van buca sper Dieus vi. El rimna ellas, sco in custeivel scazi, gie dumbra schizun ellas. Il vers dat a mi consolaziun e lai sentir mei che Dieus ei cun mei, en miu pitir ed en miu bargir.
Jeu giavischel a ti ed a mi, che nus saveien enconuscher en nossas larmas custeivlas pedras che lain madirar nus, che lain medegar e ligiar quei ch’ei rut e vulnerau en nies intern.