Siglir tar il cuntegn

Header

audio
Pled sin via
Or da Vita e cretta dals 01.07.2022.
laschar ir. Durada: 3 minutas 1 Secunda.
cuntegn

Pled sin via Las stailas

Cur cha qualchün vo in fanzögna as disch ch’el giaja per las stailas intuorn. Que saregia eir per quelo cha bgers poets as laschan inspirer da las stailas.

Ma nus savains cha las stailas servan eir scu guida per umauns e per utschels migrants. Da vegl inno daun ils planets indicaziuns sur da l’andamaint dal muond e servan per ün’incletta da nus stess. Columbus giaiva sur mêr a tschercher terras estras in cumpagnia da las stailas. E na schmancher la famusa staila da Nadel chi condüa ils sabis a Gesu.

Ir per las stailas, ir da staila a staila, da planets a la glüna, viager tres galaxias incuntschaintas per perscruter l’univers, es in nos temp l’aspiraziun na be dad astronoms ed astrologs per intents persunels, ma l’interess dad inters stedis cun millieras dad scienzios ed enorms indrizs tecnics.

Sondas e satellits ans transmettan stupendas imegnas dals planets e lur rinchs, da surfatschas da cuntredgias incuntschaintas e da fouras nairas chi travuondan tuot que chi’d es intuorn. A vegnan installedas custaivlas staziuns interplanetaricas, ma a guarder propi bain, sun eir quellas be üna puolvra in quist spazi infinit.

Dunque ir in fanzögna, ir per las stailas pudess bain esser üna profuonda aspiraziun da nus tuots. Quella da vzair qualchosa pü grand cun l’immaginabel, da’s bütter i’l infinit. Il poet Giacomo Leopardi as lascha najanter cun plaschair in quist mêr d’immensited: «Così tra questa immensità s’annega il pensier mio: E il naufragar m’è dolce in questo mare.»

As der vi a quists spazis illimitos paress da der andit ad üna odissea persunela e collectiva per scuvrir infin se svess, savair d’inuonder cha’s vegn.

Il mistiker Angelus Silesius ho fat sias ponderaziuns losupra e disch a l’umaun chi dumanda: «Il muond m’ais memma stret, il tschêl memma pitschen. Inua as rechatta ün spazi per mia orma?»

Silesius respuonda: «Fermat, inua cuorrast Tü? Il tschêl es in te svess. Tscherchast Tü a Dieu utrò, al manchauntast Tü adüna».

In quist sen as giavüsch per quista sted üna buna contemplaziun dal tschêl stailieu extern ed intern.

RTR Pled sin via 08:45

Artitgels legids il pli savens

Scrollar a sanestra Scrollar a dretga