(sursilvan) «Forsa», «probabel» ni «jeu mirel lu aunc.» Talas rispostas dun jeu bugen. Jeu vi buc empermetter zatgei che jeu sai ni vi buca tener. Enstagl da gir gie, pli bugen aunc spitgar giu empau e tener aviert ina porta. Cu in termin ei inaga fixaus ni in uffeci acceptaus, eis ei memia tard. Jeu sun segir buca la suletta che ha denteren bugen quels termins provisorics, aschia ch’ins sa aunc dir giu il davos mument, en cass ch’ei sedat zatgei meglier. Mo buc esser ligiaus memia fetg, pli bugen aunc tener liber autras opziuns. Quei pertucca buca mo nies temps liber, cu igl ei da decider sch’ins vul ir ad ina fiasta ni far la spassegiada. Entgins suprendan era ina nova plazza cul patratg da lu forsa encurir zatgei auter en in ni dus onns. Mo buc esser ligiaus memia fetg.
Dad ina vart eis ei pia bien da buca seligiar memia fetg. Dall’autra vart duvrein nus denton era certs ligioms, quei muossa era la religiun.
Per tgi che sto reservar ina meisa en in’ustria ni per tgi che vul planisar ina fiasta eis ei stentus, sche la collega decida pér il davos mument definitivamein, sch’ella pren uss part ni buc. Mo probabel ei quella tenuta ina reacziun sin nossa moda da viver e dad esser en contact in cun l’auter. Oz sto tut ir spert, magari pliras caussas parallel, e contonschibels essan nus da tut temps. Biars legian aunc la sera e-mails e ston trasora esser sil current. Cheu eis ei segir era bien, sch’ins tegn liber certas caussas e s’oblighescha buca memia fetg. Sche jeu sun stauncla la sera, sai jeu lu cun buna cunscienzia dir giu in termin e star sin canapè. Quei tuna empau dad egoist, mo nus essan gie era responsabels per nossa sanadad.
Dad ina vart eis ei pia bien da buca seligiar memia fetg. Dall’autra vart duvrein nus denton era certs ligioms, quei muossa era la religiun. Ins sa ir da quei anora ch’il plaid religiun vegn dil latin religare che munta «ligiar anavos». En quei senn vul il carstgaun seligiar vida zatgei divin che dat in tegn en la veta. Per mei munta religiun denton buca mo dad esser aviarts per il divin, mobein era da veser che nus essan colligiai cun biars auters carstgauns cun semeglionts desideris. Jeu manegel che nus duvrein tals ligioms che dattan segirtad e tegn, gest en nies temps nua che tut semida aschi spert. Quels san gidar da vegnir sin auters patratgs e da tschentar las dretgas prioritads. Jeu vi per exempel sespruar da metter d’ina vart il handy la sera e prender temps per auter. Forsa che quei gartegia el futur empau pli savens che tochen dacheu. Lein mirar…