(sursilvan) Sco ins fa, eisi buc endretg. Quei saveva gia Jesus. Tier Mattiu (11.18f) savein nus leger: «Sogn Gion Battesta magliava e bueva buc ed ei schevan: In demuni ha priu possess dad el. Il fegl da Diu magliava e bueva ed ei schevan: Mirei in magliadrun.» Pia sco ins fa, eisi buc endretg.
Veramein: Jesus, il fegl da Diu magliava e bueva cun ses giuvnals. La historia dalla nozza da Cana regorda nus da quei. Cu il vin ha muncau, ha Jesus transformau sin la supplica da sia mumma sis ruogs da crap plein aua en in vin prezius. Buca mo la miracla ei remarcabla, mobein era la quantitad. Schizun per ina nozza orientala era quei fetg bia. Mo tgei han els fatg cun ton vin?
Jeu dundel quei pauc da memezza ch’jeu saiel, ed ils auters schazegien quei sco grond schenghetg.
Il grond clericher Hieronymus ha rispundiu gia avon 1500 onns sin quella damonda empau grittentaus: «Nus buin aunc oz da quel.» A Kafr Cana, in liug el contuorn da Nazareth, buc lunsch naven dil lag Genezareth, anflein nus en pliras baselgias ruogs, dils quals ei vegn pretendiu ch’ei seigien quels dalla nozza da Cana.
Senza considerar la dimensiun teologica dalla historia, pretendel jeu: La transformaziun cuntinuescha. Probablamein ha Hieronymus patertgau vid l’Eucaristia, nua che paun e vin vegnan transformai en tgierp e saung da Cristus. Da quei vin savein nus beiber aunc tschientaners suenter la nozza da Cana – ed aschia gustar in toc dil parvis.
Mo forsa va ei aunc pli sempel da declarar: Mintgaton sundel jeu stauncla ed exausta e tuttina lessel dar ad auters enzatgei. Jeu haiel mo aua enstagl da vin. E lu schabegia la miracla: Jeu dundel quei pauc da memezza ch’jeu saiel, ed ils auters schazegien quei sco grond schenghetg. Quei sa esser in bien plaid, in surrir, in gèst ni in strocla en in mument da cumpassiun e sustegn en ina situaziun difficila. Ord pauc haiel jeu fatg bia. Per enzatgi auter hai jeu fatg vin ord aua. Enzatgi fa adina puspei vin ord nossa aua ed ei aschia part dalla transformaziun.