(sursilvan) Avon circa 20 onns sun jeu vegnius per l‘emprema gada en contact cul mund dallas medias socialas. Entschiet ha ei lu cun «Facebook» ed onns pli tard ein aunc «Twitter», «Instagram» ed autras medias ein vegni vitier. – Ei era in‘ experientscha nundetg interessanta! Cuninaga fuva ei fetg sempel da restar en contact cun amitgs ed anteriurs conscolars, da veser tgei che collegs han fatg la davosa fin d‘jamna e da leger las lingias grassas avon ch‘ellas cumparevan il proxim di ellas gasettas. – Cuninaga era il mund mo pli in clic naven!
Quei vul dir: buc adina crer tut quei ch‘enquera sensaziun, ed era buc adina parter mintga lingia grassa che polarisescha. Mobein emprender da distinguer e differenziar, e lu finalmein da salvar il bien e quei che fa bein ad ins.
Mo ils temps ein semidai. Avon treis onns hai jeu bandunau la gronda part da quellas plattaformas. Buca perquei che jeu vess giu il nas plein ni vess passentau memia bia temps vida miu telefonin! Na, la raschun era plitost da veser tgei pussonza che persunas, sco Elon Musk e Donald Trump vevan sin quellas plattaformas. Certas plattaformas ein daventadas culs onns pli radicalas e messadis grittentai eran buca pli l‘excepziun. Ed il respect sch‘enzatgi veva inaga in auter meini, quel era strusch pli avon maun. Tut quei che polarisava, ha generau dapli clics e likes!
En quei connex ei vegniu endamen a mi in plaid che Paulus veva giu scret inagada. En ina da sias brevs scriva el «Examinei tut e quei ch‘ei bien salvei!» (1 Tes 5,21)
Tenor mei ei quei in plaid fetg sabi, ual ozildi, nua che lingias grassas e tematicas che polariseschan, survegnan ina preschientscha enorma ella medias socialas. Quei vesin nus surtut tier figuras sco Donald Trump. El survegn ina attenziun enorma, perquei che ses plaids ein fetg accentuai, perquei ch‘els provocheschan e simplificheschan la realitad. Tier el dat ei strusch ina vesta differenziada: u ch‘enzatgei ei «great» ni ch‘igl ei nuot auter che «fake news». – Mo biaras gadas , sco nus savein, schai la verdad enzanua denteren.
Aber aschia eis ei: quei che polarisescha, survegn nossa attenziun. E senza che nus sentin ei, influenzescha ei nossa vesta sil mund. E cheu savess il cussegl da Paulus dar ina cunterpeisa. El recamonda da buca mirar naven, mobein dad examinar tut. Quei vul dir: buc adina crer tut quei ch‘enquera sensaziun, ed era buc adina parter mintga lingia grassa che polarisescha. Mobein emprender da distinguer e differenziar, e lu finalmein da salvar il bien e quei che fa bein ad ins. – Era sche quei cussegl ei varga 2000 onns vegls, crei jeu ch‘el savess gidar nus ad ina convivenza pli pascheivla. Enzatgei che nies mund vess propi da basegns.