Tgei schess Sogn Clau da Myra, sch’el vesess che nus festivein Sontga Clau?
Jeu crei buca ch’ei fuss stau impurtont ad el da veser las bialas glischs. Schegie ch’el vess magari schon giu plascher dallas decoraziuns d’advent. Jeu creiel plitost ch’el vess mirau da saver gidar persunas che han da basegns. Che gidar fuss per el stau part dil temps d’advent, da quei temps che la carstgaunadad cristiana selegra ch’il Messias vegni gleiti a vegnir.
Nus tuts enconuschin pli probabel la legenda che Sogn Clau hagi la notg fiers in sac cun marenghins sur in mir, per che las treis giuvnas sappien selubir ina buna letg e stoppien nuota vender sesez. El ei pia staus in um cun in cor grond che ha mirau pil bien da ses concarstgauns.
A tgi dess el ni meglier detg, a tgi savessen nus oz dar in sac cun marenghins?
Sogn Clau ha repartiu ses marenghins avon bi e bein 1700 onns. Mo – sch’el vivess oz aunc, a tgi dess el ni meglier detg, a tgi savessen nus oz dar in sac cun marenghins?
Eisi igl affon dil vischin che savess duvrar empau agid culs pensums ni semplamein ina meisa tut persuls per el en stiva, nua ch’igl ei ruasseivel ed el sa seconcentrar pulit per far ils pensums, magari aunc cun ina tschugalata caulda ed in crefli?
Ni eisi la dunna che sescogna schon puspei cun siu um e ch’ins sedamonda, schebein ella piteschi pia era da violenza ella letg ni sch’ei seigi plitost igl um che piteschi sut il sevilem dalla dunna – ni sche omisdus piteschien sutlunder sco era ils affons... Mo co segidar cun els? Tgei marenghin dess ei per gidar cheu? In marenghin plein carezia?
Ni eisi la tatta egl asil ch’ins ha daditg buca pli visitau, che viva tut persula ed ei gia fetg dementa, seregorda strusch pli da ses affons. Tgei marenghin dess ei da svegliar tals muments rars ch’ina glisch semuossa els egls dalla tatta sco pli baul, ch’ella ei cheu, presenta, seregorda, raquenta, era sche mo per in amen. Bi, ch‘ella ei cheu.
Els tuts savessen magari duvrar agid ord il sac da marenghins. Marenghins che dattan temps, marenghins che dattan ruaus, marenghins che dattan suost e segirtad, marenghins che fan targlischar ils egls, marenghins che…
Cara lectura, car lectur, jeu giavischel a Vus in bi e cuntenteivel temps d’advent. Cun in sac plein differents marenghins per bia concarstgauns.