(sursilvan) «E lu, cu maridas?
Has schon dumandau tia cara?
Uss vai lu liber, ti eis schon 30!
Jeu vegn lu alla nozza. Cu eisi schi lunsch?»
Gie, il maridar… in pass, in process, ina ceremonia che ha liug sin gl’entir mund. Dapi tschentaners vegni maridau. En Kenia vegni saltau ordaviert cun schumbers e saults, ell’India vegni maridau cun colurs e massa fluras, ell’Albania vegni cantau l’entira notg cun saltar tallava ed era en Svizra vegni maridau, tier nus vegn il di da nozzas denton aunc partius en duas gruppas.
Ils quals che vegnan mo il suentermiezdi agl apero – quei ein quels ch’ins sto bunamein envidar en sco conluvrers, amitgas dil club da yoga ni vischins. La sera astgins lu selegrar dils hosps ch’ins ha aunc bia pli bugen – pia ils super-hosps, che astgan festivar l’entira notg per in bi daner.
Duess ins insumma maridar? Ei quei aunc necessari?
Mo, tgi envid’ins atgnamein alla nozza, il grond di dall’amur eterna?
La gliesta fuss gronda: Ondas da lunsch e da maneivel, cusrins che han era envidau en ins sez, la madretscha ch’ins ha dapi 20 onns buca pli viu, la conluvrera da pli baul, tier quella ch’ins ha atgnamein gnanc pli grond contact, il colleg digl emprendissadi ch’ins vesa mintga sapadieus cu ni igl aug che beiba adina schi bia ch’el anfla gnanc sez pli la via a casa?
Ach gie, tgi duessins envidar en? Eisi forsa meglier, sch’ins fa vegnir ensumma negin auter ch’ils geniturs ed ils fargliuns? La finfinala vai per l’amur eterna e buca per in natalezi rodund.
Probabel eisi gie era ina damonda dils daners. Han ins veramein gust da dar o ils 40'000 melli francs ch’ins ha spargnau els davos onns, per la finfinala rumiar ensemen sez las meisas la damaun baul dallas 6, cura che tut ils hosps ein finalmein sescarpitschai ord la halla ch’ins ha priu a tscheins? Ins savess gie era mo far zatgei pign pignet avon casa el curtin. Aber tgei pudess lu mia megliera amitga tertgar? Las nozzas da lez eran numnadamein giganticas, malgrad ch’els han gia puspei schau spartar suenter dus onns. Vitier vegni gie aunc, ch’ins gnanc spargna cun maridar. Na, il cuntrari ei il cass, ins paga aunc dapli taglia.
La damonda principala ei denton la suandonta: Duessins atgnamein insumma maridar el 2023? Ei quei aunc necessari? Tuts dian adina, maridar seigi zatgei schi bi. Tgei ei denton il bi vid quei? Daco duess jeu maridar? Per cuntentar mei ni forsa mo per far cuntents mia partenaria? Ins savess gie era simplamein aschia ver bugen in l’auter, senza contracts, ceremonias ed empermischuns. Mo, quei era halt adina schon aschia. Clar, pli baul stuevas maridar, avon che ver affons, schoc devi in scandal. Quei eran auters temps. Tgi sa, forsa ei quei aunc ina utopia d’affonza, cura ch’ins vuleva exnum esser princessa e prenci e maridar en in casti. Tgi sa.
Apropos affons. Ston ins veramein esser maridai per educar endretg ils affons? Ed ensumma, tgi surpren tgei num da tgi sch’ins marida? Duessan ins dar naven il bi num da buoba, Camathias, Bigliel, Monn, per surprender il num dil spus, Cahenzli, Demarmels ni Flury? Ei quei in act da demonstraziun? Duess la dunna surprender il num digl um, ni duess igl um modern suprender quel dalla dunna?
E tgei schabegia, sch’ins va dapart el futur e sto schar sparter? Ay caramba, lu entscheiva il brimbori. Cons e contas han gia piars lur casas, praus, affons e l’entira existenza muort la lètg ch’ei ida dall’aua giu? Avunda. La quota da 50 % spartidas carmala era buc exnum da seligiar per veta perpetna.
E co duessan ins atgnamein maridar sco catolic? Astg’jeu metter en damonda la lètg? Eisi acceptau, sch’jeu resentel quei process sco in act antiquitau? Astgins ver sex avon la lètg? Eisi ok sch’jeu maridel ina dunna d’in autra religiun? Disturba ei Diu, sch’jeu maridel sper la mar cun in caipirinha enta maun enstagl da maridar ella baselgia amiez il vitg?
Damondas e damondas, mo neginas rispostas.
El cass ch’in ni l’auter vess da survegnir el futur in’invitaziun da nozzas da mei – seigi quei ussa per la varianta light, mo apero, ni per la varianta all inclusive, tochen la notg viaden, allura saveis esser segirs ch’jeu hai anflau las rispostas. Speronza.