Pled sin via - Marlis Flepp: «Dir na è ina cumpetenza»

(sursilvan) Essas vus era gia vid emplenir vossas agendas pil temps avon e duront Nadal e Daniev? Tscheinas da fatschenta, concerts, cumpras da schenghetgs, invitaziuns e sentupadas, marcaus da Nadal e Daniev, projects ch’ein aunc da finir … E buc d’emblidar las fiastas culla famiglia. Veis vus era la tendenza da prender avon bia pil december per lu zacu realisar che la summa da tut quels termins e las occurrenzas ein semplamein da memia?

Il motiv daco che l’agenda ei pleina ei fetg sempel: Nus savein buc dir na. Nus vein empriu che dir na ei malhofli ni egoistic. Nus vein il sentiment che nus trumpein nies visavi ni schizun che nus s’audien lu buc vitier e che nus vegnien refusai. Nus scumbiglein amicabladad cun s’adattar. E bia gadas eis ei pli sempel da dir gie, perquei che nus stuessan schiglioc sedeclarar ed argumentar.

Jeu less far curascha a vus da dir dapli na per che vus hagies dapli temps ed energia pils gie ella veta. Pli pauc ei savens dapli. Ei va buc per dir notoricamein na, mobein per quels muments che nus schein gie ed el profund da nies cor schessan nus pli bugen na.

Jeu hai svilupau ina strategia per mei persunalmein. Viktor Frankl ha inspirau mei: «Zwischen Reiz und Reaktion ist ein Raum.» Quei vul dir, sch’jeu survegnel ina damonda ni ina proposta per ina sentupada, ina tscheina communabla ni schiglioc in termin, lu nezegel jeu il spazi denter la damonda e mia reacziun. Jeu ditgel lu savens: «Jeu stoss mirar suenter en mi’agenda e dun lu part a ti.» E lu vai jeu temps da reflectar per mei, sche jeu less propi dir gie e sai tedlar sin mia intuiziun. Impurtonta ei nossa tenuta interna. Dir gie cun perschuasiun, denton era na, sch’ei vegn memia bia. Sche nus manegiein ei sincer e da cor, lu sa nies visavi acceptar nossa perstgisa.

En quels muments dun jeu buca mo spazi a mia decisiun – jeu dun spazi alla premura da memezza ed jeu sun cunscienzia ch’in na ei era in gie per mei.